Membru Parlamentu Nasional lamenta ho oknum membru Polisia Nasional Timor-Leste (PNTL) balun uja fali armas hodi kasa animal arbiru deit.
Membru Komisaun B (seguransa, defeza, negosiu estrangeiru), Depudata Ana Ribeiro, hateten armas ne’ebe governu sosa hodi defende interese estadu, la’os uja fali ba kasa animal iha ailaran.
“Kilat ne’e uja hodi ba interese nasaun nian, la’os ba interese privadu,” Deputada Ribeiro lamenta, iha Parlamentu Nasional.
Nia hatutan, iha instituisaun PNTL iha lei internal ne’ebe bandu maka’as membru PNTL ida utiliza armas la tuir nia dalan.
Tanba ne’e nia sujere ba Komandante PNTL atu fo sansaun disiplinar ba membru ne’ebe halo aktu refere.
“Fo sansaun ba membru ne’e, hodi nune’e ba futuro la halo tan hahalok ne’e,” nia sujere.
Hatan ba kestaun ne’e Sekretariu Estadu Seguransa (SES), Francisco Guterres, hateten kona ba membru ne’ebe utiliza salah kilat, Komandante PNTL sei toma atensaun ba ida ne’e.
“Uja fali kilat hodi ba kasa, ne’e komandante jeral fo ona sansaun,” SE Guterres hateten.
Nia hateten, agora dadaun komandante jeral halo hela kontrolu ba kestaun ne’e, tanba em prinsipiu membrus PNTL iha regulamentu ne’ebe regula sira nia lala’ok uja armas.
“Hau hatene katak, agora dadaun komandante halo hela kontrolu, ne’ebe agora dadaun la’o diak hela,” SE Guterres hateten.
