Membru Parlamentu Nasional kestiona kona ba estrada Dili ba Ainaro ne’ebe tuir planu atu halo iha tinan ida ne’e, maibe to’o agora Ministeriu Obras Publiku (MOP) seiduak bo’ok.
Membru Komisaun E (infra-estrutura,transporte e komunikasaun), Deputada Albina Marcal, hateten asina kontraktu ho kompania hodi halo obra ne’e iha kedas tinan kotuk, tuir lolos obra ne’e bele komesa ona iha tinan ida ne’e.
“La hatene nia difikuldade ne’e iha ne’ebe?,” Deputada Marcal preokupa, ih Parlamentu Nasional.
Tanba wainhira Komisaun E ba halo fiskalizaun nia dehan, komunidade iha area ne’eba sempre kestiona kona ba kondisaun estrada ne’ebe la favoravel ba sira hodi hala’o sira nia aktividade.
Ne’e duni nia husu ba MOP ho esforsu tomak responsabiliza ba kestaun ne’e, tanba ne’e nudar nesesidade baziku.
Hatan ba kestaun ne’e Ministru Obras Publiku (MOP), Gastao Sousa, hateten projetu ne’e agora hein deit husi parte tribunal kontas ba verifikasaun.
“Konselho Ministru aprova ona, hein kontraktu ne’e lori ba tribunal kontas hodi verifika, se los ona komesa halo ona obra ne’e,” Ministru Sousa hateten.
Nia rekonese, durante ne’e prosesu atu halo projetu ba estrada ne’e atraza, tanba osan ne’ebe halo obra ne’e barak liu, entaun tenke liu husi Tribunal Kontas.
Alem de ne’e, nia dehan, husi parte ministeriu tenke selu kompensasaun ba komunidade sira ne’ebe kuda nia kafe iha los dalan ninin.
“Tanba ne’e mak to’o oras ne’e dadaun obra ne’e seidauk lao,” Ministru ne’e hateten.
