Arguido AR tuku lezada MB to’o desmaia, tanba diskonfia lezada (67) uja ai kulit at hodi halo AR nia oan moras grave.
Tuir akuzasaun Ministeriu Publiku (MP) ne’ebe lee sai husi Juis Singular Dusarte Tilman, katak iha dia 21 Agostu 2013 lokraik, arguido nia oan ba halimar iha lezada nia uma, depois wainhira arguido nia oan fila, hetan kedas atakasaun (iis bo’ot) no muta rai rahun.
Ho akontesementu ne’e, arguido diskonfia katak lezada MB mak halo nia oan hodi ai kulit at, nune’e arguido ba ataka lezada iha lezada nia uma, tuku no tebe lezada to’o desmaia.
Hafoin lee hotu akuzasaun husi MP, Juis Singular Tilman, husu ba arguido hakarak koalia ou nonok hodi prova, katak akuzasaun ne’e loos hotu.
Maibe, iha altura ne’eba arguido hili atu koalia, hodi dehan, iha tempu ne’eba arguido hetan informasaun husi nia kaben, katak nia oan loron ida tomak halimar deit iha lezada nia uma, depois fila mai hetan kedas atakasaun ne’e.
“Hau nervozu no halai kedas ba nia (lezada) uma hodi tuku no tebe nia,” dehan Arguido iha julgamentu iha Tribunal Distrital Dili (TDD).
Arguido deskonfia lezada mak halo, tanba iha inisiu arguido nia oan iha kondisaun saude ne’ebe diak, no durante ne’e nunka iha moras iis bo’ot hanesan ne’e.
Entretantu lezada MB, rekonese katak arguido nia oan feto ba halimar iha lezada nia uma, maibe la halo buat ida ba arguido nia oan.
“Labarik ne’e ba halimar deit ho hau to’o lokraik, mak fila ba nia uma,” lezada MB deklara iha tribunal.
Depois de rona tiha deklarasaun husi arguido no lezada, juis singular foti desizaun hodi fo pena multa ba arguido, tanba laiha faktus ne’ebe forte hodi prova, katak arguido nia oan hetan moras tanba ba halimar iha lezada nia uma.
