Komisaun Nasional ba Eleisaun (CNE) hala’o sosializasaun kona ba edukasaun sivika ba estudantes ensino sekundario nudar eleitor foun.
Komisaria CNE, Joana Dulce Vitor, hateten hanesan informasaun baziku kona ba sistema eleitoral no resensiamentu iha Timor –Leste, importante tebes ba sidadaun hotu atu komprende, ezerse sira nia direitu votu iha eleisaun tuir mai.
“Ami la’o kuaze 13 distritus laran tomak halo sensibilizasaun ba eleitores sira liu –liu estudantes, nudar eleitores foun hodi hatene sira nia direitu ba vota,” Komisaria Vitor hateten bainhira halo sensibilizasaun ba estudantes sekundario sira iha Dili laran, iha Tower Fatuhada, Dili.
Materia hirak ne’ebe koalia iha sensibilizasaun ne’e mak, nia dehan, kona ba orgaun eleitorais iha Timor –Leste, sistema eleitoral, resensiamentu eleitoral no partisipasaun feto iha politika, “atu sira bele iha konesementu ba baze legal balun ne’ebe garantia feto nia partisipasaun,”.
Nia hatutan,CNE liu husi sub-disresaun edukasaun sivika halo ona aprosimasaun ho Ministerio Edukasaun atu materia hirak ne’ebe liga ho orgaun eleitores iha Timor –Leste inkaixa iha kurikulum edukasaun nian.
Iha parte seluk, estudante Armandina de Araujo, hateten nudar eleitores foun sira agradese tebes ba programa ne’e, tanba aumenta sira nia konesementu kona ba sistema eleitoral no resensiamentu eleitoral iha Timor –Leste.
“Agora ami komprende ona prosesu eleitoral ne’ebe iha liu –liu kandidatu presidente sira eleitu ho votus pursentu hira, nune’e mos governu no prosesu kontagen votus,” nia dehan.
