Komunidade suku Labadai, distritu Covalima husu ba Ministeriu Obras Publiku (MOP) atu hadia ponte labadai, tanba wainhira tempu udan fo ameasa ba komunidade sira bainhira ultrapasa.
Komunidade Delfina Amaral Lopes, hateten ponte labadai ne’e at tinan rua ona no to’o agora governu seidauk hadia.
“Tempu udan ita liu labele kuak barak, kuandu lori motor no kareta ita tauk los,” Lopes hateten, iha Suai, Covalima.
Tanba ne’e nia husu ba Governu liu husi Ministeriu Obras Publiku (MOP) atu bele toma atensaun ba problema ne’e.
Iha fatin hanesan Deputadu Aniceto Lopes, hateten kestaun estradas no ponte sira sempre levanta iha plenaria Parlamentu Nasional no governu iha responsabilidade atu hadia.
“Balun governu konsege resolve no balun seidauk,” Deputadu husi bankada Fretilin ne’e hateten.
Hatan ba kestaun ne’e Ministeriu Obras Publiku (MOP), Gastao de Sousa, hateten sira nia ekipa presiza ba haree uluk ponte hirak ne’ebe at iha distritu Covalima tanba dezastre naturais, antes hadia.
“Ita presiza haree nia kerusakan ne’e oinsa no presiza halo ho emergensia ga la’e,” Ministru de Sousa hateten.
Agora dadaun, nia dehan, MOP nia ekipa tun ona baze hodi kobre distritu tomak atu haree pontu estragus estrada no pontes.
“Para ita halo tuir planu,” Ministru Sousa dehan.
