Tribunal Distrital Dili julga kazu hadau malu mane (AB) ne’ebe involve vitima MM (fen kaben husi AB) no LL nudar arguida, ba kazu ne’e.
Kazu refere akontese iha distritu Liquisa, iha dia 21 Marsu 2013. Tuir deklarasaun vitima MM iha tribunal, katak MM nudar fen kaben husi AB, no sira moris hamutuk nudar fen ho la’en tinan 12 ona ne’ebe iha oan feto ida no mane nain tolu.
Iha 2012, vitima MM deklara, nia kaben AB komesa halo’o relasaun domin ho LL, maibe subar deit, no desde ida kedas sira nain rua (MM-AB) uma laran laiha ona harmonia.
“Hau sempre hetan baku wainhira hau nia la’en fila ba uma, buat saida deit mak hau halo ba nia ladiak hotu, mas hau pasensia deit. To’o loron ida hau hetan informasaun husi hau nia alin feto katak katuas oan selingkuh ho LL,” vitima MM deklara iha Tribunal Distrital Dili (TDD).
“Maibe hau la fiar ida,”.
MM konta, iha loron ida AB hader sedu los, dehan atu ba servisu no MM husu ba nia nusa mak sedu los ne’e, maibe AB la hatan. No wainhira MM ba merkadu sosa modo hetan fali AB lori hela LL ba ospital.
“Iha ne’e mak hau foin diskonfia, no nia fila mai uma hau husu, nia dehan kolega,” MM konta.
Vitima MM konta tan, katak iha kalan ida wainhira AB toba, nia loke AB nia mobile cek mensajen sira ne’ebe tama no konsege hetan duni mensajen mesra husi LL ba AB no iha momentu ne’eba MM foti kedas nomor hodi telephone ba LL hodi hasoru malu.
No wainhira hasoru malu, nia dehan, tanba liafuan la han malu, LL dada uluk MM nia fuuk to’o monu ba rai.
Entretantu arguida LL iha nia deklarasaun iha TDD, katak nia la hatene katak AB iha ona ferik oan no sira nain rua foin namora fulan rua.
“Desde ami nain rua baku malu, hau para kedas ho AB, no agora ami laiha relasaun ona,” arguida LL deklara.
Hafoin rona tiha deklarasaun husi vitima no arguida, Juis Prezidente Duarte Tilman fo pena administrative ba arguida LL ne’ebe baku uluk MM iha momentu ne’eba.
