Funsionariu saneamentu distritu Dili (raut foer) nain hat mak afetadu moras Tubercoluse (TBC) no tenke baixa iha Sentru Ismaek Tibar hodi halo tratamentu ba sira nia saude.
Xefe Departamentu Saneamentu Distritu Dili, Domingos dos Santos, hateten sira nain hat ne’e kona moras TBC tanba la uja ekipamentus seguransa ba saude bainhira hala’o knar.
“Fahe tiha ona ekipamentus hanesan luvas, masker no botas ba sira, e ami fo sosializa informasaun ba sira kona ba impaktu saude publika, maibe sira lakohi uja,” Xefe Domingos dos Santos hateten, iha Matadouro, Dili.
Tuir nia, pesoal servisu saneamentu ne’e risku tebes ba moras TBC, tanba lor-loron hasoru foer no rai rahun, maibe seidauk iha konsiensia atu uja ekipamentus sira ne’e.
“Ami barak mak hetan moras ISPA no TBC, iha nain hat mak ba baixa tiha iha Tibar,” nia dehan.
Nia mos preokupa ho foer sira ne’ebe kompania no restourante sira soe, tanba hein to’o dois no ular tiha mak soe, ida ne’e fo impaktu ba iha saude pesoal sira ne’ebe ba raut.
Entretantu, Diretor Jeral Sekretario Estado Politika Formasaun Profesional e Empregu (SEPFOPE), Jacinto Barros Gusmão, hateten sira bolu ona atensaun ba Administrador distritu Dili atu fo atensaun ba problema ida ne’e, tanba sira ne’e responsabilidade governu nian.
Nia hatutan, lei iha ona maibe nia implementasaun seidauk masimu liu –liu ekipamentus protesaun ba saude iha servisu fatin, tanba ne’e tinan ida ne’e esforsu makas atu halo kampania sosializasaun ba kompania no trabalhador sira kona ba asuntu ne’e.
“Ami fo hatene ona ba iha Ministeriu Administrasaun Estatal no sira dehan ekipamentus fahe ona ba pesoal sira, maibe sira mak lakohi uja,” nia dehan.
