Oan Kiak Trust Fund Program durante ne’e fo ona bolsa estudu ba labarik Timor oan, liu –liu oan kiak sira hamutuk 2.275 husi 13 distritus hodi kompleta sira nia estudu iha nivel ensino sekundario.
Responsavel Oan Kiak Trust Fund Program, Bispo Hilton Deakin, hateten edukasaun hanesan xave ba buat hotu, tanba ne’e veteranus iha Australia inklui iha Timor oan balun halibur an hamutuk kria programa hodi ajuda oan kiak sira iha Timor.
“Hau espera programa ne’e ajuda imi bele sai lideransa ida diak hodi lidera nasaun ne’e iha futuru mai no sai inan aman ne’ebe diak ba familia,” Bispo Deakin esperansa, bainhira fahe sertifikadu ba benefisiario sira ne’ebe remata ona nia estudu iha ensino sekundario.
Iha parte seluk, Koordenadora Oan Kiak Trust Fund Program, atual Diretora East Timor Development Agency (ETDA), Palmira Pires, hateten oan kiak ne’ebe sai ona benefisiario ba programa ne’e hamutuk 2.275.
“Husi 2.275 ne’e, nain 186 mak remata ona estudu iha ensino sekundario, enkuantu nain 208 seluk sei estuda hela,” Diretora ETDA ne’e hateten.
Durante ne’e, nia dehan, sira la fo buat seluk ba benefisiario sira, maibe direitamente selu benefisiario sira nia kaixa eskolar, tanba maioria benefisiario sira eskola iha eskola privado.
“Programa oan kiak trust fund nia kbi’it to’o deit iha ensino sekundario la tama iha universidade tanba kbi’it la to’o,” nia hateten.
Nia hatutan, iha benefisiario balun mak oras ne’e dadaun servisu ona iha organizasaun local, instituisaun governu, membru Polisia Nasional no balun oras ne’e dadaun tuir hela formasaun non formal iha ETDA ho gratuita.
Nia konta, programa ida ne’e hahu iha tinan 1994, maibe paradu bainhira akontesementu 1999 no komesa fali hafoin Timor –Leste independensia.
Entretantu benefisiaria Francisca, agradese ba supporta ne’ebe programa Oan Kiak Trust Fund fo ba sira, tanba sira balun hetan ona servisu.
“Suporta ona ami to’o remata ami nia estudu iha nivel sekundario, oras ne’e dadaun ami barak mak hetan ona servisu ajuda fali familia no kontinua estudu iha universidade,” nia agradese.
