Organizasaun Fundasaun Harii Timor (FTH) oferese telephone linha gratuita ba grupos ne’ebe risku ba moras HIV/SIDA ne’ebe da’et liu husi relasaun seksual mane ho mane, kliente trabalhador seksual no drogadu sira, hodi hetan informasaun klaru kona ba moras ne’e.
Diretor FTH, Aguia Belo Ximenes, hateten linha ida ne’e estabelese atu fasilita grupos risku ne’ebe lakohi mai direita iha sentru, tanba moe no tauk, entaun sira bele kontaktu ba numeru ne’ebe iha ho gratuita atu bele hetan informasaun ne’ebe klaru ba duvidas ne’ebe sira iha.
“Ami bele fo apoiu informasaun ba sira kona ba duvidas ne’ebe sira iha ba moras hadaet liu husi relasaun seksual no HIV/SIDA,” Ximenes hateten, iha Dili.
Durante ne’e, nia dehan, iha duni ema inresponsabilidade balun uja linha ne’e hodi halimar, maibe sira nafatin fo atendimentu.
Iha fatin hanesan, Xefe Departamentu moras kontajioza Ministerio Saude, Merlita Monteiro hateten importante tebes atu fasilita informasaun ba ema hotu ne’ebe sei iha duvidas kona ba moras hadaet liu husi relasaun seksual no HIV/SIDA.
“Maibe atu hatene sira nia status, uniku solusaun mak halo teste ba ran, la’os sik deit,la’e,” nia dehan.
