Feto potensial distritu Ainaro ejiji ba Sekretaria EStadu ba Promosaun Igualdade (SEPI) atu estabelese Sentru Organizasaun Feto Timor (SOFT) iha distritu hotu, tanba durante ne’e sira hala’o aktividades barak, maibe fatin mak laiha.
Reprezentante feto potensial distritu Ainaro, Alvina dos Reis Araujo, bainhira sira hala’o aktividades ou programa ruma apoia inan feto sira iha baze, maibe laiha fatin atu halibur malu.
“Ami husu atu harii sentru OMT iha distritus hotu, hodi akumula inan feto sira hotu, tanba hau hanoin atu halo aktividade ida kuandu laiha edifisiu, susar,” Alvina preokupa, bainhira partisipa aktividade rona povu nia lian ne’ebe organiza husi IRI, iha distritu Ainaro.
Membru Rede Feto ne’e mos husu ba Parlamentu Nasional atu tau mos orsamentu hodi estabelese edifisiu ida ba feto sira iha distritus, nune’e bele kontribui ba dezenvolvementu nasional.
Hatan ba kestaun ida ne’e, Sekretaria Estado ba Promosaun Igualidade (SEPI), Idelta Maria Rodrigues, katak ne’e problema ida ne’ebe SEPI hasoru, tanba SEPI deit mos laiha fatin.
“Ami hanoin ona, iha tinan ida ne’e harii sentru jeneru iha distritu balun hanesan pilotu, haree sentru ne’e efisien duni ba sira atu halo buat ruma,” SE Rodrigues hateten.
Nia hatutan, estabelesementu sentru ne’e ho objetivu atu fasilita grupo feto sira bele hasoru malu, halo programa no aktividade ruma supporta inan feto sira iha nivel baze no prepara feto ba iha program desentralizasaun.
