“Gostu minutu ida, terus tinan naruk”, ne’e mak mensajen husi Sekretario Jeral Comisaun Nasional Combate ao HIV/SIDA Timor –Leste, Daniel Marçal, ba estudantes Universidade da Paz bainhira halo sosializasaun informasaun kona ba virus HIV/SIDA ba estudante sira.
Tanba ne’e nia husu ba estudante sira iha UNPAZ, atu prevene an husi virus HIV/SIDA, tanba to’o agora seidauk iha aimoruk ida atu kura virus ne’e.
“Buat hotu bele iha, maibe saude la diak o sei la goza riku soin sira ne’ebe iha, tanba ne’e saude ne’e importante tebes,” Marcal hateten bainhira sosializa informasaun kona ba HIV/SIDA ba estudantes UNPAZ, iha UNPAZ, Dili.
Nia dehan, ida ne’e hanesan informasaun baziku ba estudantes nudar foinsa’e, atu sira bele hatene HIV/SIDA da’et halo nusa no oinsa prevene an.
“Atu sira ba fatin ne’ebe deit sira bele komprende, katak saude ne’e importante, foti desizaun ruma tenke hanoin,” nia hateten.
Nia mos husu atu inkaixa mos material HIV/SIDA ne’e iha kurikulum nasional ensino sira, nune’e labarik sira bele iha konesementu no hatene prevene an husi moras ne’e.
Iha oportunidade ne’e, nia husu ba joven Timor tomak atu hanoin ba dala atus bainhira foti desizaun ruma iha sira nia moris atu bele goza to’o nia rohan, labele moris ho matan been durante tinan naruk.
Entretantu, Diretora Nasional Saude Distritu Dili, Agostinha da Costa, hateten papel joventude importante tebes atu sai mediador ba ema hotu liu husi informasaun ne’ebe iha, no buka hatene informasaun sira ne’e iha fasilidade saude ne’ebe Ministerio Saude prepara ona.
“Husu ba alin foinsa’e sira atu labele tur hein deit, maibe buka hatene informasaun ne’ebe klean kona ba prevensaun moras ida ne’e hodi prevene an no habelar ba ema seluk,”nia sujere.
Iha parte seluk, estudante Joanina Maria da Costa, promete sei habelar informasaun baziku sira ne’ebe sira hetan ba komunidade sira iha area rural atu prevene an husi virus HIV/SIDA.
“Ami agora dadaun atu ba estagio entau informasaun sira ne’e importante ba ami nune’e ami bele habelar ba komunidade sira oinsa atu prevene no kombate moras ida ne’e iha TL,” Maria dehan.
