World Vision Timor-Leste (WVTL) organiza primeira konferensia kona ba implementasaun tekniku Agrikultor Maneja Rejenarasaun Natural (FMNR) iha florestal Timor-Leste.
Asesor Rekursu Natural, World Vision Australian no Fundador FMNR, Tony Rinaudo, hateten FMNR nudar tekniku ida ne’ebe aplika globalmente, atu restaura ai horis sira iha rai okos husi ai tuuk ne’ebe moris iha area floresta degrada.
“Ho ida ne’e sei hahu haburas fali rai iha Timor- Leste no Asia Sudeste nia laran tomak. Sei hamosu fertilidade rai ne’ebe diak liu, protividade kulturas agrikolas bo’ot no liu redusaun ba insidente rai halai,” Asesor Rinaudo hateten, iha konferensia FMNR nian, iha Salaun Delta Nova, Dili.
Nia hateten, iha Timor-Leste komunidade sira gosta liu tesi, lere no sunu ai laran inklui husik balada sira han hotu duut ne’ebe fo perturbasaun ba rai hodi hamosu erosaun, degrasaun barak ne’ebe sei rezulta inseguransa aihan no mal nutrisaun.
“Maibe tinan rua ona komunidade distritu Aileu hahu uja tekniku ida ne’e, sira la sunu rai ona no agora rai hahu matak fali ona, ne’e fo esperansa ba sira,” Rinaudo hateten.
Entretantu Diretor Nasional Floresta (DNF), Manuel Mendes, apoia tebes tekniku FMNR ne’e, tanba fo vantajen diak ba agrikultor sira oinsa bele proteje ai horis. “Labele estraga ai horis deit maibe hatene oinsa mak bele haburas fali,” nia dehan.
Iha fatin hanesan Country Director World Vision Timor-Leste, Samaresh Nayak, hateten tekniku FMNR ba dahuluk foin implementa iha Aileu, suku Fahiria no tuir planu sei implementa tan iha distritu Bobonaro.
