Ministru Obras Publiku (MOP), Gastao de Souza, hateten governu sei la halo pagamentu ba kompania sira ne’ebe hala’o projetu, maibe laiha kontratu.
Ministru hato’o kestaun ne’e, tanba projetu emerjensia iha distritu Viqueque vila, sub-distritu Watu-lari, Watu-carbau, Cova lima no distritu Lospalos kompania komesa halo ona obra, maibe laiha kontratu.
“Ida ne’e hau hatete klaru, katak osan laiha atu selu, no ami apelu ona ba kompania sira atu para obra sira ne’e,” Ministru Sousa hateten, iha Dili.
Nia dehan, kompania sira labele halo obra ida bazeia deit orden de trabalhu, tanba ne’e la forte.
Tanba ne’e, nia dehan, ekipa Ministeriu Obras Publiku sei tun ba baze hodi haree obra sira ne’e, atu determina projetu ne’ebe tama kategoria emerjensia no la emerjensia.
“Projetu hotu-hotu labele dehan emerjensia hotu,” Ministru Sousa dehan ho seriu.
Iha parte seluk membru Komisaun E (infra-estruturas, transportes no komunikasaun), Deputadu Inacio Morreira, apoia sistema foun ne’e no tenke halo nune’e.
“Atu halo obra ida tenke iha kontratu, ne’e mak sistema los,” Deputadu Morreira hateten.
Kona ba projetu emerjensia ne’ebe la’o ona iha distritu lima ne’e, nia husu ba governu tenke kolabora didiak ho kompania, tanba kompania sira ne’ebe implementa projetu ne’e mos rona orden de trabalhu husi Sekretariu Estadu Obras Publiku.
“Tanba iha projetu balun 100% ona,” nia hateten.
