Membru Parlamentu Nasional, Deputadu Inacio Moreira, hateten projetu eletrisidade iha distritu Baucau ne’ebe kaer husi Kompania Bulesa hetan bronkas husi joven sira, tanba hadau malu projetu.
“Labarik joven sira mai bronkas, sobu fila fali projetu ne’e no agora sira lori malu ona ba iha tribunal,” Deputadu Moreira hateten, iha Parlamentu Nasional.
Tuir nia, governu halo kontratu ho kompania Bulesa atu hala’o projetu ne’e, maibe derepente grupu balun mai reklama fali, dehan sira nian.
“Hau hanoin tenke haruka ba Polisia atu atua, tanba hahalok ne’e krime,” Deputadu Moreira hateten.
Entretantu Sekretariu Estadu Eletrsidade(SEE), Januario Pereira, rekonese katak projetu eletrsidade iha distritu Baucau hetan problema duni, tanba haksesuk malu kona ba area ninian.
Maibe nia dehan, nia parte bolu ona ema sira ne’ebe involve iha problema ne’e inklui kompania ne’ebe kaer projetu ne’e hodi resolve problema ne’e.
“Ami halo mediasaun dala ida ona, maibe seidauk hetan konkluzaun ida,” SE Pereira informa.
Maske nune’e, nia dehan, sira nia parte nafatn esforsu an liu husi tekniku halo aprosimasaun oinsa mak bele resolve problema ne’e.
Kona ba kestaun ne’e , nia dehan, Kompania Bulesa hato’o ona problema ne’e ba iha Polisia hodi halo investigasaun.
