Iha fiskalizasaun Komisaun F Parlamentu Nasional nian ba eskola sira iha rai laran durante ne’e, nota katak eskola barak mak to’o agora sira nia kondisaun la favorable atu hala’o prosesu aprendizajen.
Membru Komisaun F (edukasaun, saude, kultura, veteranus no igualdade jeneru), Deputadu Leonel Marcal, hateten iha fiskalizasaun inklui rona povu direitamente iha baze, sira sempre kestiona kona ba kondisaun eskola ne’ebe at.
“Hau hakarak foti kondisaun eskola ne’ebe oras ne’e dadauk iha Timor laran tomak sai problema bo’ot ba ita hotu,” Deputadu Marcal levanta, iha plenaria Parlamentu Nasional.
Marcal, hateten iha debate Orsamentu Jeral Estadu (OJE) 2014 nian, Primeiru Ministru (PM) promote ona , katak iha tinan ne’e nia laran eskola hotu-hotu tenke kondisaun diak no sei la iha alunus ida atu tur iha rai mak tuir aprendizajen.
“Ami hakarak hatene, bele esplikasaun oituan prosesu ne’e la’o to’o iha ne’ebe ona no la’o oinsa ona,” Deputadu Marcal husu.
Hatan ba preokupasaun ne’e Ministru Edukasaun (ME), Bendito Freitas, politika kona ba ida ne’e tama ona iha OJE 2014 nian ne’ebe aloka $25 miloens hodi rehabilita eskola sira iha rai laran.
“Ami iha lista kompletu kona ba eskola sira ne’ebe atu halo rehabilitasaun, hamutuk 341 eskolas atu halo rehabilitasaun,” Ministru Freitas hateten.
Nia dehan, oras ne’e dadaun tama ona iha prosesu diskusaun teknika ninian, oinsa parte infra-estrutura koordena ho Ajensia Dezenvolvimentu Nasional (ADN) atu fo solusaun.
