Prezidente Komisaun F Parlamentar, Deputadu Virgilio da Costa Hornai, hateten eskola filial ensino baziku iha Tibar dadaun ne’e infrenta problema menus salas de aulas.
Nia hateten, kestaun ne’e identifika bainhira Komisaun F (edukasaun, saude, kultura, veteranus no igualdade jeneru) ba halo fiskalizasaun iha suku Tibar, distritu Liquisa.
“Iha semana kotuk ami tun ba eskola filial ida iha Tibar ne’eba, iha sala ida alunus hamutuk nain 90 kedas,” Prezidente Komisaun F ne’e levanta, iha plenaria Parlamentu Nasional.
Ida ne’e akontese, tanba falta de salas, tanba ne’e nia husu ba Ministeriu Edukasaun oinsa atu kria kondisaun ne’ebe diak, nune’e estudantes bele tuir prosesu aprendizajen ho diak.
“Ne’ebe hau hanoin politika konstrusaun ka rehabilitasaun eskolas, tenke halo mos mapa ba kresimentu estudantes iha fatin-fatin inklui eskola Tibar,” Deputadu Hornai sujere.
Hatan ba preokupasaun ne’e Ministru Edukasaun (ME), Bendito Freitas, politika kona ba ida ne’e tama ona iha OJE 2014 nian ne’ebe aloka $25 miloens hodi rehabilita eskola sira iha rai laran.
“Ami iha lista kompletu kona ba eskola sira ne’ebe atu halo rehabilitasaun, hamutuk 341 eskolas atu halo rehabilitasaun,” Ministru Freitas hateten.
Nia dehan, oras ne’e dadaun tama ona iha prosesu diskusaun teknika ninian, oinsa parte infra-estrutura koordena ho Ajensia Dezenvolvimentu Nasional (ADN) atu fo solusaun.
