Polisia Tranzito Nasional (POLTRANS) durante fulan Marsu nia laran konsege prende tan taxi hamutuk 117, tanba la tuir regras tranzito nian.
Komandate Tranzito Nasional, Inspektor Xefe Antonio L.C. Soares, hateten durante fulan Marsu nia laran sira halo operasaun loron rua; dia 06 -07 Marsu 2014. Iha loron primeiru konsege prende taxi 75 no loron tuir mai 42.
“Laiha karta kondusaun, dokumentus liu prazu, laiha lampu, uja vidru metan, kondutor la uja farda no la hakerek liafuan TAXI iha odomatan taxi,” Xefe Soares hateten, iha Kaikoli, Dili.
Nia hatutan, ba motorista sira ne’ebe mak viola regras hirak ne’e husi parte Polisia Tranzito fo ona sansaun ba sira, selu multa iha Diresaun Nasional Transportes e Terestres (DNTT).
“Karta kondusaun laiha sei selu 24 dolar, la hakerek taxi iha odamatan selu 6 dolar no la uja farda selu 30 dolar,” nia hateten.
Enkuantu membru Komisaun B (seguransa, defeza no negosiu estranjeirus), Deputada Anna Ribeiro, apoia tanba ne’e kompetensia POLTRANS nian duni hodi implementa lei.
“Dalaruma ema ida deit polisia bele prende dala rua ou dala tolu, tanba sira laiha konsiensia hodi kumpri regras tranzito nian,” nia hateten.
Tanba ne’e, nia apela, ba taxita sira atu kumpri regras hirak ne’ebe iha ona, nune’e bele minimize asidente trafiku ho illegal.
