Hafoin tinan ida makina Bileti Identidade (BI) aat no la halo atendementu ba komunidades, maibe ho orsamentu jeral 2014 nian Ministeriu Justisa hadia hikas makina ne’e no agora hahu funsiona fali. 
Ministru Justisa Dionisio Soares Babo, hateten makina ne’e kompania husi Timor oan ida joint venture ho kompania internasional mak kaer.
“Diak tiha ona no komesa funsiona ona,” Ministru Babo hateten, iha nia knaar fatin, Colmera, Dili.
Ministru Babo, hateten ministeriu nafatin fo atensaun masimu ba makina ne’e, nune’e bele halo manutensaun rutina ba makina sira ne’e.
“Atu nune’e labele faila no aat,” nia hateten.
Entretantu Deputada Josefa Alvares Soares, hateten iha debate Orsamentu Jeral 2014 foin lalais, Parlamentu Nasional aprova osan ba makina ne’e.
“Tanba ne’e nesesidade povu no ita hotu nian,” nia hateten.
Nia hatutan, makina ne’e importante tebes no tenke hadia nune’e bele atende halo dokumentus Billete Identidade e dokumentu ida ne’e sidadaun hotu tenke iha.
“Nune’e ita la’o tun sa’e mos ita sente seguru,ne’ebe ne’e importante,” nia dehan.
