Membru Parlamentu Nasional, Deputadu Francisco da Costa, hateten parlamentu seidauk ajenda Lei Municipiu halo diskusaun iha plenaria no agora sei iha Komisaun A nia fatin.
Membru Komisaun A (asuntu konstitusionais, justisa, administasaun publika, poder local no anti korupsaun) ne’e, hateten komisaun A agora dadaun halo hela diskusaun kona ba lei imprensa nian.
“Draft lei ne’e prepara kedas iha governu anterior nia tempu e to’o agora seidauk tau ajenda atu diskute,” Deptadu da Costa hateten, iha Parlamentu Nasional.
Nia dehan, lei municipiu importante duni atu halo diskusaun iha plenaria, tanba atu implementa programa pre de konsentrasaun presiza lei ne’e.
“Programa de konsentrasaun ne’e diak, tanba administrativu direitamente ba iha povu, hanesan orsamentu hira mak iha nasional aloka ba iha distritu hodi hala’o dezenvolvementu,” nia hateten.
Tanba nia dehan, liu husi programa ne’e povu bele akompanha direitamente ba ezekusaun orsamentu ba iha distritu ninian.
Iha sorin seluk Sekretariu Estadu Fortalesementu Instutisional (SEFI), Francisco Borlaco, hateten atu sai jestor ba programa pre-de konsentrasaun tenke hatene planu prioridade iha distritu laran.
“Nia tenke hatene halo planeamentu,” SE Borlaco hateten, iha Sentru Konvensaun, Dili.
Sekretariu Estadu ne’e, dehan jestor tenke hatene orsamentasaun, tenke hatene lidera prosesu diskusaun no tenke hatene mos halo relatoriu monitorizasaun.
“Nudar ema politiku no mos nudar servidor, nia tenke hatene administrasaun ho lolos,” nia hateten.
Nia hateten, jestor tenke hatene planu estratrejiku atu nune’e programa ne’e la’o ho politika ,konseitu no vizaun ida.
“Hanesan ne’e nia bele salva guarda orsamentu ne’ebe la’o iha kraik nia bele la’o ho diak,”Borlaco hateten.
Atu sai jestor tenki hatene identifika potensialidade iha distritu laran.
Iha sorin seluk Reitor Universidade Nasional Timor Lorosae (UNTL), Aurelio Guteres, hateten agora Timor oan barak mak prepara ona atu asumi kargu jestor ba distritus.
“Ita nia diretor jerais sira, kriteria ne’ebe ita bo’ot sira hato’o ne’e bele priense ona,” nia hateten.
Reitor UNTL ne’e, dehan diretor sira ne’e durante tinan 10 nia laran iha ona esperiensia kona ba servisu ne’e.
