Prezidente da Republika, Taur Matan Ruak (TMR), hateten atu kombate moras kankru iha rai laran, edukasaun sensibilizasaun informasaun importante tebes, aumenta populasaun sira nia konesementu no bele prevene an ho sedu.
Xefe Estado ne’e, hateten povu Timor –Leste presiza informasaun ne’ebe rigorozu kona ba moras kankru, tanba moras ida ne’e foun ba povu Timor –Leste.
“Eduka ema sira hodi hatene kona ba sintomas kankru,bainhira mosu realize teste medikus atu ajuda detekta moras ida ne’e no prepara hodi fo tratamentu ida diak,” Prezidente TMR hateten, iha Sentru Konvensaun, Dili.
Xefe Estado ne’e mos fo apoiu tomak ba instalasaun servisu onkologia atu resposta no prepara an hodi hasoru dezafius sira ne’ebe sei mai tanba tuir autoridade mundial saude nian preve iha tinan 10 mai kankru sei kontinua aumenta no hadaet barak liu tan ba ema sira.
Prezidente mos husu ba entidade hotu liu –liu sosiedade sivil sira hotu atu hamutuk hodi halo kampania no sosializasaun ne’ebe klean liu tan ba populasaun sira atu komprende hodi buka solusaun ba kura moras ida ne’e.
Iha fatin hanesan, Ministru Saude, Sergio da Costa Lobo, hateten oras ne’e dadaun Ministeriu Saude estabelese ona grupu apoia kankru atu dezenvolve politika no planu estrategiku hodi atu servisu hamutuk ho sosiedade sivil sira hotu atu halao sosializasaun ba populasaun kona ba factor risku ne’ebe kontribui ba kankru no privalensia moras kankru iha rai laran no nia sintomas.
Nia hatutan edukasaun importante tebes tanba realidade ne’ebe iha pasiente kankru sira mai iha fasilidade saude ho stadium ne’ebe medikus sira labele halo buat ida ona.
“Ita iha ona grupo trabalho ba kankru ne’ebe sei servisu hamutuk ho grupo apoiu kankru sei halo kampania sosializasaun ba komunidade sira kona ba sintomas no oinsa prevene an husi faktores risku sira ne’ebe kontribui ba moras kankru,” dehan Lobo.
Nia hatutan iha tinan kotuk ospital sira registu kazu kankru hamutuk 98 numeru ne’ebe bele dehan ki’ik maibe presiza nia intervensaun tanba tratamentu ba moras kankru ne’e laos fasil no Karun.
Entretantu Fundador Grupu Apoiu Kankru (mulut rahim no susun) mos hanesan sobrevivente ba moras kankru susun, Kristy Sworth Gusmão, hateten sira prontu atu sai parseiru ministeriu nian hodi luta kombate moras kankru iha Timor –Leste.
“Ami sei halo aktividade sosializasaun edukasaun publika laos deit iha Dili maibe iha area rural mos no organiza enkontru regular ba feto malu sira ne’ebe agora dadaun sofre moras kankru fo infomrasaun no referral ba sira atu pesoal saude sira bele ajuda,” dehan Gusmão.
Nia hatutan grupo apoiu kankru susun nudar grupo ki’ik oan ida sei labele halo buat hotu mesak presiza entidade hotu nia kontribuisaun hodi luta kombate moras ida ne’e.
