Prosesu Rekosiliasaun Komunitaria ne’ebe durante ne’e la’o iha rai laran konsege resolve kazu 381 ne’ebe akontese iha komunidade nia le’et liu husi justisa tradisional. 
Diretor Prosesu Rekonsiliasaun Komunitaria (PRK), Ciquito Gutteres, hateten durante PRK tun ba baze hodi foti dadus kona ba kazus ne’ebe akontese iha sukus iha distritu hotu no konsege rekolha 1500 kazus.
“Resolve ne’e hamutuk 381, kazu 80 mak entrega ba Ministeriu Publiku tanba iha indikasaun krimi todan, entaun ne’e labele resolve iha baze ho PRK,” Diretor Gutteres hateten, iha Palasio Prezidente, Aitarak laran, Dili.
Nia dehan, PRK hanesan dirasaun ida iha Comisaun Akolhamentu Verdade no Rekonsiliasaun (CAVR) nia okos, durante ne’e hamutuk ho lia nain sira konsege resolve problema kma’an sira ho sistema justisa tradisional.
Nia hateten, iha 10% kazus wainhira PKR no lia nain sira atu resolve, vitima no arguido la marka prezensa, situasaun ne’e akontese barak liu iha distritu Ainaro no Viqueque.
Kazu ne’ebe PRK no lia nain sira resolve mak hanesan kazu sunu uma, basa liu ema, tolok malu, na’ok sasan, oho ema nia animal arbiru no seluk tan.
Iha parte seluk Deputada Albina Marcal, apresia ho servisu PRK, tanba ho asaun sira ne’e hatudu funsionamentu lei ne’e iha.
“Lei fo fatin atu halo ida ne’e no agora dadaun implementasaun lei ne’e la’o hela,” nia hateten.
Maibe nia dehan, justisa tradisional nia aplikasaun ne’e barak liu iha distritu 12, distritu Dili ladun iha no la implementa.
