Membru Parlamentu (MP) sujere ba Ministerio Saude liu –liu medikus foun sira ne’ebe ba estuda iha Cuba, atu dezenvolve sistema doutor da familia ne’ebe sira aprende iha Cuba hodi fo atendementu saude ba komunidade sira. 
Deputada Ilda Maria da Conçeicão, hateten sistema ne’ebe hanaran doutor da familia ne’e kapaas no importante tebes atu fo tratamentu no halo edukasaun promosaun saude ba komunidade sira iha baze atu moris iha ambiente ne’ebe moos.
Deputada husi bankada Fretilin ne’e, hateten sistema ala Cuba ne’e bele mos minimize numeru pasiente iha ospital sira, tanba kada semana mediku sira tun direitamente no fo tratamentu ba komunidade sira.
“Ita nia numeru doutor aumenta barak, maibe hau husu ba sira atu implementa sistema ida ne’e, nune’e iha netik mediku ida atu kontrola ema sira iha bairo laran nia kondisaun saude,” membru Komisaun F (edukasaun, saude, kultura, veteranus no igualidade jeneru) ne’e hateten, iha Parlamentu Nasional.
Entretantu Ministru Saude, Sergio da Costa Lobo, hateten dadaun ne’e ministerio dezenvolve hela programa foun vizita domisiliariu (sai uma tama uma) hodi fo konsulta ba komunidade sira.
Nia hateten, programa ne’e positive tebes atu hadia kuidadus primarias tanba durante ne’e servisu ida ne’e ladun ativu.
“Ita halo ona deslokasaun medikus iha sukus hamutuk ho medikus familiares inklui mos mediku Cubanu ne’ebe iha sub-distritu atu bele fo atendementu kuidadus primarias, nune’e ita bele hadia kondisaun ospital,” SE Lobo hateten.
Atu programa ida ne’e la’o ho susesu, nia hateten, Ministerio Saude estabelese ona linha koordenasaun servisu ho ministerio relevantes sira hanesan Ministerio Administrasaun Estatal, Edukasaun no Ministeriu Solidaridade Sosial.
Iha parte seluk komunidade Jaime Pinto, hateten programa ne’e positive tebes tanba bele fasilita komunidade sira liu –liu ferik katuas sira, bele hatene sira nia kondisaun saude no fasil atu hetan tratamentu.
“Iha Sentru Saude Uato-Carbau programa ne’e la’o ona, maibe seidauk masimu hanesan ami ne’ebe hela besik doutor kada semana sempre mai vizita ami konsulta no fahe hanoin oinsa moris moos,” nia dehan.
