Deputada Ana Ribeiro, lamentavel ho situasaun estudantes iha eskola Ensino Sekundariu numeru 02 Vila Nova, distritu Baucau ne’ebe tenke halai ba to’os laran bainhira atu soe bee, tanba eskola laiha bee moos. 
“Eskola ne’e besik hau nia uma, hau akompanha eskola ne’eba,eskola ne’eba bee laiha,aluns sira ba hobur hotu iha to’os laran soe fo’er liu-liu bainhira kabun moras,” Deputada Ana Ribeiro kestiona, iha Parlamentu Nasional.
Deputada Ribeiro, hateten eskola ne’e durante ukun an to’o mai agora laiha bee moos no fo difikulta ba estudante sira atu soe bee iha haris fatin.
Tanba ne’e nia dehan, hakarak ka lakohi estudante tenke halai ba iha ema nia to’os laran.
“Sira sai ba iha ne’eba dala ruma ema ne’ebe hein bibi duni tan sira,” Deputada Ribeiro hateten.
Tanba ne’e nia sujere ba Ministeriu Edukasaun (ME) tenke dada bee no halo moru protesaun ba eskola ne’e tanba moru protesaun mos laiha.
Entretantu Deputadu membru Komisaun F (edukasaun, saude, kultura, veteranus no igualidade jeneru ,) Eladio Faculto, hateten durante ne’e eskola barak mak animal sira tama arbiru deit iha laran, tanba laiha moru protesaun.
“Presiza iha moru para bele proteje fasilidades eskola nian iha eskola laran labele hetan estragus,” nia dehan.
Nia mos preokupa tanba eskola barak iha rai laran seidauk monta seguransa, tanba ne’e ministeriu edukasuan tenke tau atensaun mos ba kestaun ida ne’e.
Hatan ba preokupasaun ne’e Ministru Edukasaun, Bendito Freitas, katak kona ba fasilidades eskola ninian dala ruma profesor no diretor eskola sira mak seidauk intende didiak jestaun ba admistrasaun eskola ne’e rasik.
“Buat hotu ne’ebe at ligadu ba haris fatin no ba buat sira ki’ik oan ne’e, hau hanoin diretor sira bele tau matan atu hadia’a,” nia hateten.
