Atu minimize krimi iha rai laran Polisia Nasional Timor Leste sei hadia sistema operasaun iha tinan 2014, sei halo sistema foun.
Komandante do Komando da Operasional Nasional, Superintendente Xefe Armando Monteiro, hateten iha ona sistema barak mak husi polisia halo, no iha 2014 sei halo mudansa ituan deit iha sistema ne’ebe trasa ona.
Komandante Monteiro, dehan agora dadaun iha 442 sukus komesa establese ona Ofisial Polisia Sukus, sira nia servisu maka kria relasaun diak entre outoridade local sira.
“Hamutuk ho autoridade local, joventude, organizasaun govermentais, religiozu, veteranus, oinsa atu bele buka solusaun ba problema ne’ebe komunidade infrenta,” Komandante Monteiro.
Nia dehan tan, PNTL mos sei kria Komisaun Direktiva Distrital Polisiamentu Komunitaria iha nivel distrital.
“Primeiru iha distritu Liquisa, sira nia servisu maka fo apoiu logistika no finansas, sira buka osan no entrega ba komisaun polisia komunitaria atu bele halo atividade ho komunidade,” nia dehan.
Nia garante katak, liu husi program sira hanesan ne’e maske la halakon liu krimi, maibe bele redus nia numeru oituan.
“Hau garante, katak liu husi asaun sira hanesan ne’e bele minimize duni kestaun konflitu iha rai laran,” Komandante Monteiro garante.
Iha lidun seluk Membru Komisaun B (seguransa, defeza no negosiu estranjeiru), Deputada Maria Lurdes Bessa, apoia tebes inisiativa no program ida ne’e, maibe iha mos faktus balun hatudu katak polisia mos involve iha krimi balun.
“Ba membru sira ne’ebe maka involve iha krimi no krimi organizadu sira, kuandu iha provas, iha evidensia tenke hola medidas, atu nune’e labele fo ezemplu ba komuniade atu bele tuir,” Deputada Bessa dehan.
