Membru Parlamentu Nasional kestiona maka’as kona ba vida profesores voluntariu iha rai laran ne’ebe to’o agora seidauk hetan estatutu permanente.
Deputadu Inacio Moreira, hateten profesores sira ne’e balun hanorin kleur ona.
“Hau bele prova, senhora ida iha ami nia kuadru Quelicai, nia ne’e professora antiga Portugues ninian, nia hanorin lingua Portugues husi tinan 2000 to’o ohin loron la foti, ” Deputadu Moreira kestiona, iha Parlamentu Nasional.
Tanba ne’e nia husu ba Komisaun Funsaun Publika, atu fo esklaresemntu, razaun saida mak profesora ne’e seidauk tama ba iha permanente.
Entretantu membru Komisaun F (edukasaun, saude, kultura, veteranus no igualidade jeneru), Deputadu Eladio Faculto, hateten professor balun nia naran publika sai tiha, maibe to’o agora seidauk hetan direitu ba rejime.
“Professor barak mak dehan mai hau, katak ami nia dokumentu sira sai tiha ona, maibe ami la hetan ami nia direitu,” Deputadu Faculto haktuir.
Tanba ne’e nia sujere ba Komisaun Funsaun Publiku (KFP) atu halo avaliasaun fila fali ba problema ida ne’e.
Hatan ba preokupasaun ne’e Prezidente KFP, Komisariu Liborio Pereira, katak problema ne’e akontese tanba sala husi Ministeriu Edukasaun.
“Hau dehan Ministeriu Edukasuan mak sala, tanba iha 2011 ami fo kompetensia ba Diretor Jeral atu lista ema sira temporariu ne’e ba halo konversaun, maibe la lista, ne’e sira nia kulpa,” Komisariu Pereira hateten.
Nia dehan, KFP halo ona buat hotu-hotu para ema labele lakon nia direitu, maibe karik profesores balun lakon sira nia direitu, ne’e la’os ona responsabilidade KFP nian.
Tuir lista ne’ebe iha katak total professor voluntariu oras ne’e dadauk hamutuk 4.200 no dadaun halo hela verifikasaun.
“Ita tenke halo rekrutamentu, tanba tuir lei tenke submete,ema ne’e hakarak atu sai funsionariu mak foin bele rekruta,” nia dehan.
