Husi total orsamentu $24,176 milioens iha tinan 2013, Ministeriu Agrikultura no Peskas (MAP) konsege ona ezekuta 85%.
Ministru Mariano Asanami Sabino, hateten inprinsipiu husi obrigasaun ho cash ne’ebe ministeriu hasai ne’e hamutuk ona 85%, falta deit 15%, mais ida ne’e uza iha capital dezenvolvementu ne’ebe liga ba projektus irigasaun nian no depende ba kompania halo hotu maka ministeriu selu dala ida.
“Sei iha dalan klaran ita selu ona, mais sira la konsege halo hotu osan ne’e sei fila, kestaun ne’e ami informa ona ba iha sira ne’ebe kaer osan ba capital dezenvolvementu,” Ministru Asanami Sabino dehan, iha Dili.
Nia mos dehan, tanba osan kuandu fila no husi parte Ministeriu Agrikultura e Peskas sei labele selu iha 2014, maske projetu remata obra.
“Wainhira ami hasai osan, ne’e tenke halo fali planu 2015, ne’e maka ami dehan katak kuandu ami aloka ona osan imi tenke halo hotu,” Ministru dehan.
Nia mos informa katak, ho osanmentu 2013 ne’e, MAP konsege halo ona irigasaun lubuk ida; irigasaun iha Oe-Cusse ida, Baucau ida, Viqueque ida, Cassa ida no iha Gesu lima, ne’e rehabilitasaun deit.
Iha fatin seluk Deputada Jacinta Abu Cau Pereira, hateten ezekuasaun ne’ebe diak, tanba MAP uja duni osan ne’e tuir nesesidade ne’ebe iha.
“Importante maka osan sira ne’e uja tuir nia dalan no planu ne’ebe trasa ona,” Deputada Pereira dehan.
Nia mos rekonese, katak MAP rehabilita duni irigasaun iha fatin-fatin, no espera katak iha kualidade diak, nune’e bele dura ba tempu kleur.
