Dadaun ne’e Ministeriu Obras Publiku hamutuk ho kompania local sira hahu monta manilas iha estradas sira iha Dili laran, liu-liu iha patre Colmera nian, ne’ebe sempre akontese inundasaun bainhira tempu udan.
Sekretariu Estadu Obras Publiku (SEOP), Luis Vaz Rodrigues, hateten tinan-tinan Colmera sempre akontese inundasaun, tanba Timor Telekom cor tiha kanu depois tau fali kabel iha ne’eba, entaun bee susar atu sai.
“Agora, ita tenke hasai tiha no tau iha fatin seluk no monta fali gorong-gorong ne’e, hodi bee ne’e halai fali ba tasi,” SE Rodrigues dehan, iha Mandarin, Dili.
Nia hateten, tuir kontratu ne’ebe iha obra ne’e sei remata iha fulan Novembru tinan 2013, ne’ebe tama fulan Dezembru hotu ona.
“Orsamentu ba halo obra ne’e hamutuk $3 milioens,” SE Rodrigues dehan.
Depois de monta iha Colmera ne’e, nia dehan, sei monta fali iha fatin seluk, maibe tuir levantamentu dadus ne’ebe mai.
“Halo levantamentu ne’e iha tempu udan, tanba tempu udan ne’e maka ita foin hatene buat ne’e nia moras ne’e iha ne’ebe, bee ne’e sa’e iha ne’ebe, la’os ita foti dadus iha bailoron,” nia dehan.
Entretantu Deputada Albina Marcal, membru Komisaun E (Infra-estruturas, transportes no komunikasoens), rekonese no husu ba atu halo ho kualidade.
“Iha tempu udan fatin ne’e sempre akontese inundasaun, tanba ne’e to’o ona tempu ba governu atu hare ba kestaun ne’e,” Deputada ne’e dehan.
Nia mos husu ba governu, atu nafatin halo monitorizaun ba kompania ne’ebe kaer obra ne’e, tuir duni dezenu ga la’e.
“Liu husi BOQ ga la’e, kestaun sira ne’e presiza hare didiak,” Deputada Marcal dehan.
Iha fatin seluk komunidade Colmera, Mateus Fernandes, hateten Colmera presiza duni monta manilas, tanba fatin ne’e sempre mosu inundasaun bainhira tempu udan.
