Falintil-Forsa Defeza Timor-Leste iha ona planu atu kria sistema foun ba Forsa Maritime hamutuk ho Polisia Maritima no ministeriu relevantes ne’ebe iha ligasaun servisu ho sira, ne’ebe sei hanaran Sistema Autoridade Maritima.
Komandante Falintil-Forsa Defeza Timor-Leste (F-FDTL), Brigadeiru Jeneral Filomeno Paixao hateten, Sistema Autoridade Maritime ne’e, sira mak sei halo controlasaun ba tasi Timor nian ho diak liu tan.
“Nune’e ita labele sosa hadau malu, pur ezemplu hanesan roo, labele sosa kilat bar-barak, ita uja hamutuk deit, tanba ita mos hanoin kona ba populasaun nia susar,” Brigadeiru Jeneral Paixao dehan, iha Palasio Prezidente, Aitarak Laran, Dili.
Nia garante, katak sistema ne’e sei iha vantajen diak, tanba planu no sistema ne’e planeadu kedas ona iha tinan 2009, maibe iha tinan ida ne’e maka sei koko atu implementa.
“Hare katak wainhira systema ne’e implementa sei la sosa roo no sasan barak,” Paixao garante.
Entretantu Deputadu Duarte Nunes, apoia tebes planu ida ne’e, tanba kestaun ida ne’e sai mos preokupasaun iha publiku durante ne’e.
“Karik sai realidade, ba hau rasik, ne’e diak liu tan, tanba ita efisien liu, maske sira la’o hamutuk, maibe ida – idak hala’o nia servisu,” Deputadu Nunes apoia.
Nia fo ezemplu, karik mosu krimi ruma ne’e servisu polisia nian, lori sasan illegal mai rai laran, ne’e bea cukai ka alfandega nia servisu no karik mosu ameasa ruma ba nasaun, F-FDTL mak atende.
Maibe nia dehan, antes atu halo sistema ne’e presiza iha estudu ruma ne’ebe klean atu nune’e buat ne’ebe halo’o ona ne’e extende ba tinan barak no nia kontinuasaun ne’e ba bebeik.
