Administrador sub-distritu Maubisse, distritu Ainaro, Luis Casimiro Lopes, hateten Maubisse sei sai sentru ba aifunan ne’ebe sei atrai turista barak iha future, tanba iha potensialidade ba aifunan no iha paizajen ne’ebe furak kompara ho distritu sira seluk. 
Nia dehan, atu promove diak liu tan Maubisse furak liu –liu aifunan oras ne’e dadaun governu local hamutuk ho komunidade sira halao hela preprasaun ba festival ki’ik ida iha Maubisse hodi promove aifunan ne’ebe sub-distritu ne’e iha ba ema hotu.
Nia hatutan, katak atividade ida ne’e hanesan esperiensia foun ida ba Timor –Leste, tanba ne’e kada tinan sei realize nafatin hodi promove fatin turismu sira ne’ebe iha ba ema hotu.
“Ida ne’e mak ami promove ba Maubisse nia future, la’os mate ho festival ne’e maibe ita sei kontinua nafatin tanba ita nia governu mos kria ona fasilitasaun liu –liu green house ita bele kria grupu hodi kuda aifunan, duke loron bo’ot ruma sosa aifunan sira husi liur,” nia dehan.
Iha oportunidade ne’e administrador mos fo agradese ba ema estrangeirus ne’ebe loke ona governu local nia hanoin atu dezenvolve potensialidade ne’ebe Maubisse iha hodi hasa’e rendimentu ekonomia komunidade iha rai ne’eba.
Iha parte seluk, Inisiativador Takahashi Shiheulito, hateten festival ne’e importante tebes ba Timor –Leste liu –liu sub-distritu Maubisse atu hatudu potensialidade ne’ebe sira iha ba ema hotu.
Liu husi atividade ida ne’e, bele fo hanoin ba komunidade sira hotu iha rai laran liu –liu area sira ne’ebe potensialidade atu enkoraja sira, dezenvolve atividade kuda aifunan no bele hadia mos sira nia rendimentu ekonomia uma laran.
“Hau rona iha Timor sosa aifunan husi liur (Bali), hau triste tanba iha Timor laran aifunan iha hanesan roja, kamboja, angrek no seluk tan,” nia preokupa.
Nia informak, katak festival ne’e sei iha atividade barak hanesan pameran aifunan no sira mos sei fahe informasaun ba partisipantes sira hotu kona ba oinsa halo kartaun uja aifunan maran ne’ebe sei halibur husi kantor local balun.
