Diretora Jeral Servisu Autonomo Medikamentus e Ekipamentus da Saude (SAMES), Odete Maria Freitas Belo, hateten sira nia parte seidauk simu pedidu ou rekizitus items aimoruk nian husi Ospital Nasional Guido Valadares.
Nia hato’o kestaun ne’e, tanba dadaun ne’e Ospital Nasional Guido Valadares (HNGV) sei falta hela items aimoruk balun ne’ebe presiza los.
Diretora ne’e afirma, kuandu simu ona pedidu, klaru SAMES halo kedas distribuisaun aimoruk no iha semana kotuk sira komesa ona distribui aimoruk ba distritu sira ne’ebe pedidu tama, hanesan distritu Suai no Manatuto.
“Hau seidauk asina despaisu ba HNGV nia pedidu, signifika katak sira nia karta seidauk to’o iha hau nia fatin,” Diretora Jeral SAMES,Odete Maria Freitas Belo dehan, iha Kampung Alor, Dili.
Nia hatutan, dadaun ne’e aimoruk iha SAMES iha hela, maibe atu halo distribuisaun tenke bazeia ba pedidu items aimoruk ne’ebe sira husu. Maibe karik iha pedidu ne’e items aimoruk balun laiha, sira haruka karta ida ba Ministeriu Saude atu sosa iha lozas ne’ebe iha.
Entretantu Xefe Departamentu Farmasia HNGV, Inacio da Costa, hateten Apotik Kimia Farma hatama duni items aimoruk hamutuk 33 items, maibe seidauk distribui ba fasilidade saude sira, tanba Komisaun Avaliasaun ba Aimoruk ne’ebe halo avaliasaun ba items sira ne’e seidauk entrega ba iha SAMES.
Tuir nia, HNGV iha tipu rekizasaun rua; regular kada fulan no emergensia, tanba HNGV hanesan top ospital iha Timor –Leste, presiza stok aimoruk ne’ebe sufsiente atu fo atendementu ba pasiente sira.
“Agora dadaun aimoruk 10% laiha, hanesan aimoruk sub-espesial, restu husi total ida ne’e stok iha liu –liu aimoruk kategoria esensial,” Xefe Farmasia ne’e dehan.
Entretantu Deputada Ilda Maria da Conçeicão, lamenta tebes ho problema setor saude nian, liu –liu falta aimoruk tanba orsamentu sira aprova ona hodi sosa aimoruk, maibe povu kontinua halerik ba aimoruk.
“Hau mos hetan lista bo’ot ida husi Ospital Referral Baucau, katak falta aimoruk ne’ebe ita nia pasiente presiza tebes aimoruk sira ne’e, fulan sia ona orsamentu mos aprova tiha ona maibe seidauk konsege sosa aimoruk ba fasilidade sira ne’e,” Deputada Ilda lamenta.
