Bispo Diocese Dili, DomAlberto Ricardo da Silva, hateten ohin loron Timor-Leste hetan independensia, tanba povu kumpri sira nia dever.
Dom da Silva hato’o ida ne’e iha nia homilia, bainhira halo misa ba sarania sira iha Igreja Be Meta, Suku Betano, Sub-distritu Same, Distritu Manufahi, iha dia 19/08/2013.
“Ita dezenvolve no uja ita nia kapasidade ne’ebe Na’i Maromak fo atu kontinua halibur no haburas ho siencias no teknolojia moderna iha kampu istoriku,” Amo Bispo Ricardo hateten, iha Betano.
Tanba ne’e, nia husu, povu tenke brani no badinas luta ba sira nia vida, dignidade, libredade, nasaun no luta ba nia autodeterminasaun independensia.
“Ita selebra ita nia independensia sai nasaun livre no povu livre, tanba iha konsiensia ida mak kumpri ita nia dever,” Bispo da Silva katak.
Intensaun misa iha Betano, Amo Bispo dehan, atu husu grasa no tulun bo’ot atu halakon pobreza no analfabetismu iha rai doben Timor-Leste sai nasaun ne’ebe prospera iha Asia nia laran.
“Nain feto povu Timor nia inan doben tulun Timor-Leste atu keta la’o mesa-mesak iha ita nia estadu mundu ohin loron ninian,” Amo Bispo hasa’e orasaun.
Entretantu Sekretariu Estadu Antigu Kombatente da Libertasaun Nasional, Julio Sarmento da Costa alias Meta Malik, fo agradese ba Amo Bispo Dom Ricardo da Silva ne’ebe mak konsege realiza misa ba desmobilizadu sira no mos ba komunidade Suku Betano.
“Ami mos fo agradese ba Amo Paroku ho madre sira ne’ebe tulun atan ami durante ne’e, prepara no organiza buat hotu no ohin ita bele selebra misa iha ne’e,” SE Meta Malik agradese.
SE mos la haluha hato’o agradesementu ba Prezident da Republika, Taur Matan Ruak (TMR), Prezidente Parlamentu Nasional, Vicente Guterres, Komandante Jeral Falintil-Forsa Defeza Timor-Leste (F-FDTL), Mayor Lere Anan Timor no mos desmobilizadu sira ne’ebe mak atende misa inklui kantor/a sira.
“Ba sarani tomak rai Manufahi liu-liu rai Betano ne’ebe durante ne’e tulun ami, iha tempu tomak iha samana hirak liu ba kotuk, fo fatin ami organiza servisu ida ne’e,” Meta Malik agradese.
Iha fatin hanesan komunidade Betano, Maria da Cruz katak,misa selebrasaun ne’e importante, fo agradese ba eroi sira ne’ebe mak lakon sira nia vida ba ukun an ida ne’e.
“Ita mos tenke agradese ba ita nia estadu ida ne’e, tanba fo ona rekonesementu ba ita nia veteranus sira ne’ebe mak sei moris,” da Cruz hato’o.
Nia hateten nasaun ne’e hamri’ik ema barak mak hetan sofre no barak mak lakon sira nia vida ba rai ida ne’e.
“Tanba ne’e misa selebrasaun ne’e ita fo harohan ba ita nia maluk sira ne’ebe mak lakon sira nia vida iha tempu funu no ita mos labele haluha hato’o agradese ba ita nia maluk sira ne’ebe mak sei moris,”komunidade ne’e hato’o.
