Dreinagen iha suku hat iha Dili laran ne’ebe hala’o husi Ministeriu Obras Publiku desde fulan Marsu 2013 to’o agora seidauk remata.
Sekretariu Estadu Obras Publiku (SEOP), Luis Vaz Rodrigues, hateten agora dadaun obra sira ne’e lao hela.
“Obra iha Becora hau hare la’o hela, laiha problema agora dadaun sira tenta atu hadia nafatin, tanba box be’e kiik liu antaun sira tenke esforsu atu bele halo bo’ot tan,” SE Rodrigues dehan, iha Mandarin, Dili.
Nia dehan, obra iha Becora eskola STM, Audian no Cina Rate kaer husi Kompania BTK Uni Pessoal, no obra iha Kaikoli kompania Samudra Uni Pessoal, no iha Liquintai kaer husi Kompania Turislau.
SE hatutan, kuaze dreinagen iha suku hat ne’e presiza halo bo’ot, tanba wainhira udan mai ne’e volume bee ne’e bo’ot tebes.
Kona ba atinji ona pursentu hira obra hirak ne’e, nia dehan, seidauk hatene tanba kompania seidauk hato’o relatoriiu mai iha SEOP.
Iha parte seluk Deputadu Mateus de Jesus, rekonese katak iha suku hat ne’e risku duni ba inundasaun bainhira tempu udan.
“Tanba ne’e, ne’e inisiativa ne’ebe diak, halo bo’ot drinagen sira ne’e, halo manutensaun ba kanu kuak sira atu nune’e bee bele la’o ho diak,” Deputadu de Jesus katak.
Enkuantu komunidade Kaikoli, Tomas Fernandes esperansa katak, ba future inundasaun se la akontese tan bainhira udan, no husu ba governu atu halo luan bee dalan sira ne’e, tanba Kaikoli sempre bee nalihun kuandu udan.
