Polisia Nasional Timor-Leste sei harii tan postu lima iha capital Dili, liu-liu iha bairo ne’ebe risku ba konflitu.
Komandante Jeral Polisia Nasional Timor-Leste (PNTL), Komisariu Longuinhos Monteiro, dehan sira nia parte identifika bairo hirak ne’ebe kategoria risku ba konflitu iha Dili laran.
“Ita sei monta postu polisia lima, postu tolu iha area Comoro no rua iha Becora,” Komisariu Monteiro dehan, iha Kaikoli, Dili.
Nia hatutan, bairo hirak ne’ebe kategoria risku ba konflitu mak, Comoro Beto Barat, Beto Timor, Kampung Merdeka, eis Merkadu Becora no bairo Kuluhun.
Kada postu ida, nia afirma, sei monta polisia nain tolu ou nain rua, nune’e bele halo atendementu ba kualker situasaun ne’ebe maka mosu iha parte refere.
Entretantu Deputadu Mateus de Jesus, apoia tebes inisiativa ida ne’e, nune’e Dili laran bele hakmatek.
“Ne’e diak tebes, polisia hatudu duni sira nia knar ho diak durante ne’e no husu atu komunidade sira bele kolabora ho polisia atu bele kria pas no dame iha rai laran,” Deputadu de Jesus katak.
Iha parte seluk komunidade Joao Fernandes, konsidera ida ne’e nesesidade duni atu monta postu, maibe polisia ne’ebe monta iha bairo hirak ne’e tenke familiar ho komunidade sira iha fatin hirak ne’e.
