Mini merkadu iha Bebonuk (Hotel arbiru oin) funsiona ona tanba negosiante sira hahu fa’an sira nia sasan iha fatin ne’eba.
Koordenador Geral Jestaun Merkadu Distritu Dili, Bonifacio Soares, hateten mini merkadu ne’e komunidade sira iha area ne’eba nia mak uja, enkuantu sira ne’ebe iha Pantai Kelapa nafatin.
“Minimerkadu ne’e komunidade sira iha fatin ne’eba nian mak uja hodi fa’an batar tunu no ikan tunu, tanba negosiante sira iha Pantai Kelapa lakohi atu muda ba iha fatin ne’eba,” Koordenador Merkadu Soares dehan, iha Dili.
Kona ba negosiantes iha Pantai Kelapa (Ministeriu Ngosiu Estranjeiru oin) ne’ebe lakohi muda, nia dehan ne’e responsabilidade Ministeriu Komersiu Industria no Ambiente (MKIA) nian atu hare.
“Distritu Dili lori deit sira, kuandu orden tun ona mai lori sira ba iha fatin ne’eba maibe komu sira lakohi, entaun komersiu mak atur fali sira,” Koordenador Soares katak.
Entretantu Deputadu Francisco da Costa, dehan presiza halo negosiasaun ne’ebe diak, antes muda negosiantes iha Pantai Kelapa ba iha mini merkadu ne’eba.
Deputadu ne’e mos husu ba negosiante iha Pantai Kelapa atu kumpri desizaun ne’ebe governu foti, hodi muda ba iha mini merkadu ne’ebe prepara tiha ona.
“Sira tenke ba duni iha fatin ne’eba, tanba mini merkadu ne’e halo duni ba sira atu halo negosia iha ne’eba,” Deputadu da Costa dehan.
Enkuantu Joao Pereira, negosiante ne’ebe durante ne’e fa’an iha Pantai Kelapa katak, fatin ne’ebe ladun diak ba sira tanba ema la asesu iha fatin ne’eba.
“Uluk ami muda duni, ami ba iha ne’eba maibe ema la ba iha ne’eba atu hola ami nia sasan,” Perreira katak.
Tuir nia, mini merkadu ne’e mos la kompleta ho ahi, bee moos no halo negosiante sira desaraska bainhira fa’an iha ne’eba.
