Komisaun Funsaun Publiku hakerek no lansa livru esplikativu kona ba legislasaun jeral, ne’ebe sai mata dalan ba Funsiunariu Publiku sira hodi hala’o knar nudar servidor estadu.
Presidente Komisaun Funsaun Publika (KFP), Liborio Perreira, hateten livru esplikativu ne’e, ho objetivu atu fasilita Funsiunariu Publiku (FP) sira hodi komprende didiak sira nia dever no direitu, inklui lala’ok administrasaun publiku nian.
Perreira dehan, inisiativa ida ne’e mai husi Primeiru Ministru atu hadia no hadiak liu tan lala’o administrasaun publiku nian tanba funsionario publiku mak sai roda governu nian hodi lori dezenvolvimentu iha rai laran.
“Livru ne’e hakerek ho linguazen ne’ebe simples, atu funsiunariu sira intende didiak sira nia dever no direitu liu –liu koalia kona ba sira nia dezempeinu,” Prezidente KFP, Perreira dehan, bainhira lansa livru esplikativu iha aniversariu bad ala-hat KFP nian, iha Sentru Convensaun, Dili.
Hafoin lansa, KFP fahe kedas livru ne’e ba iha funsiunariu sira ne’ebe marka prezensa iha serimonia ne’e, nune’e sira bele lee no komprende, e alem de ne’e KFP mos sei fahe ba funsiunariu hotu iha rai laran.
Entretantu Diretor Geral Sekretariu Estadu Politika Formasaun Profesional e Empregu (SEPFOPE), Jacinto Barros Gusmão, hateten livru ne’e kapaas no fasilita tebes funsionario publiku sira tanba ki’ik no fasil atu lori tutuir.
“Informasaun kompletu kona ba estatutu funsiunariu publiku, rekrutamentu, dever no direitu funsiunariu sira nian, entaun sira bele lori hodi lee bainhira tempu livre ruma,” Diretor Gusmao katak.
Durante ne’e, nia dehan, funsiunariu sira dala barak koalia deit kona ba sira nia direitu, maibe haluhan tiha sira nia dever, espera katak liu husi livru ne’e sira bele komprende diak liu tan sira nia funsaun.
“Ida ne’e ajuda tebes ba funsionario sira hotu iha teritoriu tomak atu komprende sira nia dever jeral no espesifiku inklui mos sira nia direitu, se la’e funsionario sira hatene deit servisu maibe la hatene sira nia funsaun lolos,” Diretor Gusmao tenik.
