Membru Parlamentu Nasional sujere ba governu, atu hamosu regra ida ba ligasaun illegal eletrisidade ne’ebe oras ne’e dadauk kontinua akontese iha kapital Dili.
Deputadu Francisco da Costa, hateten durante ne’e komunidade sira kontinua halo ligasaun illegal maibe governu seidauk halo asaun ruma.
“Tenke hamosu regra ida, para ema ne’ebe uja eletrisidade tenke selu hotu no kuandu la selu, la selu hotu,” Deputadu da Costa sujere, iha Parlamentu Nasional.
Deputadu ne’e dehan, povu iha direitu atu hetan asesu ba eletrisidade maibe iha mos dever atu fo kontribuisaun ba estadu.
“Se ita hakarak dehan fo kontribuisaun ba estadu ida ne’e, ita tenke uja legal, ita labele na’ok fali uja illegal, ne’e korupsaun,” Deputadu da Costa preokupa.
Entretantu tuir komunidade Kaikoli, Jony da Silva, katak ne’e diskriminasaun ida tanba komuidade balun selu no balun la selu no kontinua halo ligasaun illegal.
“Ami komunidade Kaikoli, kuaze hotu-hotu monta prepagu iha uma, kuandu pulsa hotu ami ba hola fali,” komunidade da Silva dehan.
Nia mos sujere ba governu atu monta hotu prepagu iha uma kain hotu-hotu ne’ebe uja eletrisidade, nune’e ema hotu bele selu ahi.
Hatan ba preokupasaun ne’e, Sekretariu Estadu Eletrisidade (SEE), Januario Perreira rekonese katak, ligasaun illegal kontinua akontese no presiza tempu atu kombate.
“Ami servisu hela,tekniku sira la’o hare hela, soke lori tempu tanba atu reinstala foun, metro prepagu iha hela konkorsu laran,” SE Perreira dehan.
Tanba tuir nia, atu fo sansaun ba kliente ne’ebe halo ligasaun illegal, tenke reinstala fali foun.
“Dala barak ema hotu preokupa, tenke fo kastigu ba ligasaun illegal, maibe kastigu la’os rezove problema. Ita tenke halo aprosimasaun oinsa para ema hotu bele partisipa,” SE Perreira katak.
