Grupu Trabalhu Jeneru husi distritu Ainaro husu ba governu atu fo formasaun ba sira nia membrus ne’ebe potensial, hodi prepara sira ba eleisaun munisipiu iha tinan 2014.
Tanba ne’e reprezentante Grupu Trabalhu Jeneru distritu Ainaro, Ana Maria Pereira, husu ba governu atu kria mekanismu ne’ebe rapidu no preve orsamentu hodi kapasita feto iha 13 distritus, tanba kapasidade mak xave importante ba feto sira.
“Governu preve orsamentu atu fo kapasitasaun, formasaun geral no espesifiku ba feto sira ne’ebe tur iha estrutura importante,” Reprezentante GTJ distritu Ainaro, Ana Maria Pereira dehan, hafoin hasoru malu ho reprezentante feto iha Parlamentu Nasional.
Entretantu reprezentante feto distritu Baucau, Domingas Soares Nunes sujere ba governu atu preve orsamentu, atu hasa’e kapasidade feto iha area hotu hanesan saude, edukasaun, industria, ekonomia, agrikultura no turismu inklui mos lideransa transformative.
“Presiza hasa’e kualidade no abilidade iha area hotu, liu –liu iha lei, orsamentu, administrasaun, lideransa transformative no teknologia hanesan komputador,” reprezentante GTJ Baucau ne’e sujere.
Ejijensia hanesan mai mos husi reprezentante feto husi distritu Ermera, Paulina dos Rosario Lemos, tanba kapasitasaun importante tebes ba sira, atu prepara an hodi kontribui mos ba prosesu sira ne’e hotu tanba se feto laiha oportunidade mak nasaun sei la ba oin.
“Fo supporta kapasitasaun ba feto Ermera sai forte liu tan iha area jestaun administrasaun finanseiru, planeamentu ne’ebe diak atu hala’o munisipiu,” Lemos dehan.
Iha sorin seluk, Prezidente Grupu Feto Parlamentar Timor-Leste (GMPTL), Deputada Josefa Alvares Soares, hateten sira sei kolabora ho Sekretaria Estadu ba Promosaun Igualidade (SEPI) kona ba asuntu ne’e.
“SEPI mak tenke kordena ho organizasaun nasional no internasional sira, atu halo programa, kapasita feto sira tanba ida ne’e servisu SEPI nian,”Prezidente GMPTL ne’e dehan.
Tuir nia, atu promove partisipasaun feto iha vida politika tenke hahu agora liu –liu kapasita feto sira iha area espesializada sira hotu.
