Reprezentante feto potensial husi 11 distritus husu ba Grupu Feto Parlamentar, atu analiza politika no lei ne’ebe iha, hodi garantia kouta feto iha Lei Kamara Munisipiu nian, tanba eleisaun munisipiu sei hala’o iha tinan 2014.
Domingas Soares, reprezentante Grupu Trabalhu Jeneru (GTJ) distritu Baucau, hateten ida ne’e obrigasaun Parlamentu Nasional nian liu-liu Grupu Feto Parlamentar (GMPTL) atu hare.
“Ami feto distritu Baucau hotu, husu ba Parlamentu Nasional atu hare politika no lei munisipiu hodi garantia kouta ba feto nia partisipasaun liu-liu iha estrutura foti desizaun, tanba ami feto mos iha kapasidade,” Domingas Soares sujere, bainhira hasoru malu ho membru GMPTL, iha Parlamentu Nasional.
Alem de ne’e sira mos husu ba parte kompetente atu hare lei sira ne’ebe vigora ona hodi garante involvement feto iha estrutura postu administrasaun to’o iha nivel sukus, tanba durante ne’e sei minimu liu.
Iha fatin hanesan, reprezentante feto distritu Liquisa, Graciana da Silva husu ba GMPTL atu analiza didiak lei eleitoral artigu 11 kona ba lista kandidatura tanba sira konsidera artigu ne’e la iha balansu igualidade jeneru.
“Ami nia hare katak seidauk to’o iha kontestu igualidade jeneru, tanba iha ne’eba hateten kandidatu numeru 1-2 mane no 3 mak feto, ami rekomenda se bele mane numeru ida, feto iha numeru rua no tolu mane, ne’e mak balansu jeneru,” reprezentante grupu feto distritu Liquisa ne’e katak.
Nia mos esperansa katak, iha eleisaun munisipiu tuir mai, involvement feto iha estrutura hanesan instaladora, asembleia munisipiu bele atinji 35% (masimu) no minimu 30%.
Iha okaziaun ne’e sira mos husu ba partidus politikus sira, atu konsidera mos partisipasaun feto tuir artigu 17 Konstituisaun da Republika ne’ebe mensiona liu –liu lista kandidatura sira.
Hatan ba hanoin sira ne’e, Prezidente GMPTL, Deputada Josefa Alvares Soares, katak labele promete maibe sira sei esforsu an atu halo aprosimasaun ho membru parlamentu tomak atu fo mos atensaun ba lei ne’e.
“Hau hanoin persentajen no profesonalidade mos, hau labele koalia uluk numeru tanba sei liu husi diskusaun, lei ne’e mos sei iha governu seidauk tama iha Parlamentu Nasional,” Prezidente GMPTL ne’e katak.
Tuir nia, maske iha artigu 17 Konstituisaun RDTL inklui artigu 45-73 hodi garante partisipasaun feto iha posizaun politika, maibe importante mak feto sira tenke prepara an.
“Ita ejiji atu tau kouta, ita mos tenke prepara an, se lae mane sei la fo fatin ba ita tanba ne’e prepara an didiak ho forma kapasitasaun,” Deputada Soares apela.
