Vise Ministra Edukasaun Ensino Baziku, Dulce Soares hateten, setor edukasaun nia papel importante tebes, atu promove igualidade jeneru, tanba nia servisu tomak liga ho labarik sira no fasil atu pasa informasaun kona ba asuntu ne’e ba sira.
Nia dehan, durante ne’e maske iha ona material balun mak koalia kona ba asuntu feto nian, maibe estudante sira seidauk iha konesementu diak kona ba igualidade jeneru.
“Bele fahe konesementu kona ba importansia no kontestu jeneru ba estudantes sira liu husi prosesu aprendizajen no enkoraja estudante feto sira atu partisipa iha kualker atividade eskola nian,” Vise Ministra Soares dehan, iha Vilaverde, Dili.
Tanba ne’e nia husu ba Sekretaria Estadu ba Promosaun Igualidade (SEPI), atu fahe hanoin no ideas ruma, atu Ministeriu Edukasaun (ME) bele estabelese Grupu Trabalhu Jeneru (GTJ) iha ministeriu laran, nune’e bele hare asuntu sira ne’e.
Nia informa, antes ne’e ME iha ona Pontu Fokal Jeneru ka GTJ no hala’o servisu diak, maibe hafoin ministru foun seidauk estabelese estrutura foun.
“Ami la konsege halo mudansa ba posisaun ida ne’e depois de Ministeriu Edukasaun fahe malu ho Sekretariu Estadu Kultura integra fali ba iha Ministeriu Turismu no Kultura, ne’e mak problema,” Vise Ministra Soares dehan, iha Vilaverde, Dili.
Entretantu eis membru GTJ iha Ministeriu Edukasaun, Afonso Soares, rekonese katak sira nia servisu ladun funsiona ho diak, depois de governasaun foun, tanba estrutura grupu la los ona.
“Ami nia Prezidente Pontu Fokal mak Sekretariu Estadu Kultura, depois de nia sai husi edukasaun, atividade mos la la’o ona,” eis Pontu Fokal Jeneru ne’e hateten.
Nia informa, durante iha sira nia estrutura tuan, sira konsege hala’o atividade lubuk ida iha tinan 2012, hodi influensia maka’as programa ministeriu nian atu promove igualidade jeneru iha ministeriu ne’e, hanesan hasa’e numeru profesora, bolsa estudu ba feto, funsionarios feto no seluk tan.
Iha fatin hanesan, Sekretaria Estadu Idelta Maria Rodrigues, rekonese katak, ME susesu tanba konsege promove igualidade jeneru, tanba ne’e iha tinan 2012, sira hetan primeiru lugar gender awards iha instituisaun governu nian, maibe agora sira nia servisu la funsiona.
“Tanba ne’e hau mai to’o iha ne’e atu fo motivasaun ba sira atu iha espiritu, nafatin hatudu prestasaun ne’ebe diak iha area igualidade jeneru tanba sira hetan segundu lugar iha gender award tinan 2012,” SE Rodrigues katak.
Nia dehan, setor edukasaun sei iha dezafius barak, tanba eskola balun laiha kondisoens liu –liu saneamentu no fasilidade seluk, ida ne’e fo impaktu ba labarik feto sira iha prosesu aprendizajen.
