Komisaun permanente sei hala’o sira nia knar hanesan bai-bain nudar nudar reprezentante povu iha Uma Fukun Parlamentu Nasional, durante tempu resesu husi dia 15 Julhu to’o 15 Setembru 2013.
Deputada Bendita Moniz Magno ne’ebe involve iha komisaun permanente ne’e, hateten komisaun permanente ne’e mak sei toma responsabilidade ba knar tomak iha Parlamentu Nasional durante feriadu.
“Hare ba lei ne’ebe mak urjente, para bele atende,” Deputada Magno informa, iha Parlamentu Nasional.
Iha fatin hanesan Deputadu Cesar Valente de Jesus dehan, iha tempu resesu ne’e depende ba vontade deputadu ida-idak ninian, maibe resesu ne’e espasu ida atu tun ba iha baze hodi hare direitamente ba dfikuldade ne’ebe mak povu infrenta.
“La’os halimar fali iha uma, ita nia papel ema haruka mai iha ne’e ita atu koalia saida,” Deputadu de Jesus hateten.
Iha fatin hanesan, Deputadu Paulino Monteiro katak,iha tempu resesu nia laran deputadu barak mak sei sai ba liur no balun tuir kursu.
“Iha komisaun permanente ne’e, partidu ida-idak fo ninia ema ida no partidu ne’ebe mak hetan numeru bo’ot mak sei fo nia ema barak,” Deputadu Monteiro informa.
