Prezidente Board Rede Feto Timor –Leste, Ivete Oliveira hateten, kongresu nasional feto ba dala hat nian ne’ebe lolos hala’o iha fulan Julhu, maibe adia tanba seidauk iha preparasaun.
Oliveira hateten, tuir planu kongresu sei hala’o fali iha fulan Agostu, hodi hein apoia husi governu no doadores sira.
“Bazeia ba konferensia imprensa iha sekretaria Rede Feto ne’ebe hala’o iha dia 07 Maiu, lolos realize iha dia 01 to’o 03 Julhu 2013, maibe la konsege, tanba iha buat barak mak presiza prepara,” Prezidente Board Rede Feto, Oliveira dehan, iha Dili.
Nia hatutan, iha preparasaun lubuk ida mak seidauk hala’o konaba kongresu ne’e no sei realize fali iha fulan Agostu, fulan oin.
Alem de fundus sira, nia dehan, presiza hare mos loron ida ne’ebe diak, nune’e bele hetan partisipasaun ne’ebe masimu husi reprezentante feto husi distritus, inklui mos membru gorvernu sira tanba kongrestu ne’e hanesan oportunidade ne’e diak ba feto sira atu fo hanoin malu.
Kongresu ba dahuluk hala’o iha tinan 2000, II iha tinan 2004, III iha 2008 no ba da-hat nian sei realize iha fulan oin, ho tema ‘Haforsa Partisipasaun Feto iha Asaun no Progresu ba Dezenvolvimentu Nasional’.
Kongresu ne’e realize ho objetivu, atu halibur hamutuk reprezentante feto sira hodi deskuti no identifika problemas no isu ne’ebe feto sira infrenta inklui mos progresu ne’ebe ultra pasa ona liu husi plataforma ne’ebe estabelese iha III kongresu iha area edukasaun, saude, justisa, politika, ekonomia, kultura no media transporte komunikasaun.
Iha parte seluk, Prezidente Grupu Feto Parlamentar Timor –Leste (GMPTL), Deputada Josefa Alvares Soares, hateten kongresu ida ne’e hanesan obrigasaun ida kada tinan hat tenke hala’o, hodi hili estrutura foun.
“Halo revizaun ka renova fali ba planu estrategiku ne’ebe sira iha, atu promove igualidade jeneru,” Deputada Soares dehan.
