Hosi: Ezequiel Freitas,TDW
Membru Parlamentu Nasional lamenta ho desizaun adidu edukasaun nian hodi hasai estudantes bolseirus Timor oan iha Filipina, sein iha konesementu husi Ministeriu Edukasaun.
tuir nia hakarak no hatama fali nia familia.
Deputa Osorio Florindo hateten, hafoin hasai tiha estudantes hirak ne’e, adidu hatama fali nia familia sira.
Tuir nia, Ministeriu Edukasaun (ME) mak iha kompetensia atu hapara ka hakotu bolserus sira nia kontratu.
“Adidu ne’e nia funsaun saida, tanba sa nia hasai bolseru sira tuir nia gostu, tau fali nia familia mak tama,” Deputadu Florindo kestion, iha Parlamentu Nasional.
Deputadu ne’e preokupa maka’as tanba bolseru nain ida ne’ebe hasai ne’e la’os husi familia riku, maibe veteranus nia oan,”kuitadu,” Deputadu Florindo kestiona.
Entretantu Vise Prezidenti Parlamentu Nasional, Deputadu Adriano do Nascimento, husu ba Komisaun F ne’ebe trata asuntu edukasaun, atu analiza didiak kestaun ne’e.
“Se valor la to’o, universidade iha regras ida dehan droup out ou tanba kestaun odiu vingansa,ne’ebe ita tenke hare no tetu didiak,” Vise PN ne’e sujere.
Tanba tuir nia, estadu lakon bo’ot bainhira governu haruka ema ba eskola, depois adidu hasai sein iha razaun.
Vise Prezidente PN mos husu ba Ministeriu Edukasaun at hare mos kona ba nomeisaun adidu ne’e tanba normalmente liu husi funsaun publiku mak toma desizaun.
Iha sorin seluk Vise Ministru Negosio Estanjeiru no Kooperasaun (MNEK),Constancio da Conceicao Pinto, hateten nia parte seidauk simu informasaun kona ba ida ne’e.
“Maibe Ministeriu Edukasaun hatene kona ba ida ne’e,” Vise Ministru Pinto hato’o.
Wainhira TDW tenta konfirma asuntu ne’e ba iha Vise Ministru Edukasaun Ensino Superior,Marcal Avelino Ximenes, maibe la konsege tanba laiha fatin.
