Hosi: Paulina Quintão, TDW
Sekretaria Estadu ba Promosaun Igualidade, Idelta Maria Rodrigues hateten, dadaun ne’e feto maluk sira iha distritu Lospalos no Aileu hetan ona formasaun kona ba halo jus ho aifuan hanesan sabraka no ainanas.
Sekretaria Estadu sente orgulhu, tanba ho tempu ne’ebe badak maibe grupu feto sira iha distritu rua ne’e konsege aprende no hatudu duni rezultadu ne’ebe positive tebes.
Maske nune’e nia dehan, sira seidauk bele halo produsaun rasik, tanba materia ne’ebe atu supporta hodi produs liu –liu kemasan (botir, masa no plastic) iha ne’e laiha.
Tanba ne’e nia dehan, sei husu nafatin ba formadores sira husi Indonezia, atu apoia grupu feto sira iha distritu rua ne’e hodi prepara material, nune’e bele hahu halo produsaun jus ho kuantidade bo’ot no ho kualidade.
“Hau hanoin kontinuasaun, ami hakarak promove duni halo buat barak atu ba fa’an no liu husi Ministeriu Edukasaun bele kopera ho grupu sira ne’e fornese ba eskola sira, ida ne’e mak ami nia planu atu hakbi’it feto sira,” SE Rodrigues katak.
Alem de ne’e nia hatutan, grupu feto sira ne’e aprende mos kona ba oinsa produs ainanas sai marmelada no rabusadu (dodol-Indo) no ba future feto sira sei aprende barak liu tan hanesan produsaun budu tasi no seluk tan.
Iha parte seluk Adjuntu Administrador sub-distritu Lautem, Julio Canto sente orgulhu ho programa treinamentu ne’e no presiza kontinuasaun atu bele kria duni grupu balun hodi produs jus ne’ebe ho diak no kualidade tanba sub-distritu Lautem iha potensial ba aifuan ainanas.
“Husu ba Partispantes sira atu aproveita tempu ne’ebe ho diak nune’e bele produs ainanas ho diak no mos kualidade tambá ita hare dala barak ainanans nebe iha hodi fo han det fahi,” informa Canto liu husi press realess ne’ebe TDW asesu.
Entretantu Treinadora Maria Gigi rekonese, katak Timor –Leste iha potensial tebes ba aifuan sira (ainanas, sabraka, lakeru no lidabuaya ) ne’ebe moris arbiru deit iha dalan ninin sira, ne’e bele fo benefisiu ba ema barak importante mak konesementu atu produs aifuan sira ne’e sai diak no kualidade.
“Timor Leste nia produtu lokal barak hau triste bainhira hau hare ema barak hemu sagiko no Delos tambá Timor iha aifuan barak presija deit ema ne’ebe matenek atu halo aifuan sira ne’e ba kaleng, ou kemasan,” treinadora Gigi dehan.
Metodu treinamentu ne’e treinador sira fo teoria ba partisipantes sira no akompania pratika direitamentu oinsa prepara aifuan sira no produs sai jus ida, partisipantes sira ne’e mai husi nivel edukasaun ne’ebe la hanesan balun remata eskola primaria, pre-sekundaria no sekundaria inklui mos eskola teknika Agrikula.
