Ezequiel Freitas,TDW
Diretor Nasional Asaun Sosial Eskolar, Carlito Mota rejeita no konsidera informasaun ne’ebe fo sai husi Deputadu Virgilio Hornai kona ba merenda eskolar ne’ebe kontinua uja menu uluk nian, katak ne’e la los no la bazeia ba faktus.
Diretor Mota dehan, agora Ministeriu Edukasaun (ME) troka tiha ona menu merenda eskolar uluk nian,liu-liu koto ne’ebe laiha nutrisaun ba labarik sira.
“Agora ami fo osan sentavus 15 ba kada estudantes liu husi eskolas ida-idak, atu sir abele sosa aihan oi-oin ne’ebe iha nutrisaun ba labarik sira, e fos ami fo nafatin sira, ne’ebe senhor Deputadu Virgilio Hornai nia deklarasaun iha jornal Timor Post ne’e la realistiku,” Diretor Mota hateten, iha Vilaverde,Dili.
Diretor Mota dehan, osan sentavus 15 ($0,15 cents) ne’e la’os nia mak aprova maibe nia propoin duni hodi uja ba sosa modo, enkuantu menu koto, masin no mina ne’e hapara desde tinan 2011 fulan Junu.
Mota hatutan, notisia jornal Timor Post, iha edisaun 14 Junu 2013, Deputadu Hornai hateten, katak merenda eskolar iha eskola kontinua uja menu uluk nian, hanesan koto, mina no masin ne’ebe dehan, ne’e laiha nutrisaun ba labarik sira.
Entretantu hatan ba kestaun ne’e Deputadu Virgilio Hornai, atual Prezidente Komisaun F (saude, edukasaun, kultura, veteranus no igualidade jeneru), katak informasaun ne’ebe nia fo sai ne’e bazeia ba fiskalizasaun ne’ebe sira nia komisaun hala’o iha fatin balun iha area remotas.
“Hau la’os tur deit iha parlamentu mak koalia nune’e, maibe bazeia ba fiskalizasaun iha area remotas e hau ba haree iha gudang,” Deputadu Hornai hateten.
Iha fiskalizasaun ne’ebe sira nia komisaun hala’o, nia dehan, sira deskobre katak maior parte eskola ne’ebe han sasoro no koto deit. “Hau fo ezemplu ida, imi ba iha Bobonaro karik, imi ba foho hun, eskola ida labarik sira han sasoro,” Deputadu Hornai tenik.
“Atu hadia kualidade de servisu ninian, la’os atu mai kritika no kontra fali hau ninia informasoens ne’ebe hau hetan iha terenu,”Deputadu Hornai dehan ho seriu.
Tanba ne’e nia preokupa tebes kona ba osan sentavus 15 ne’ebe ministeriu aloka ba eskolas ida-idak atu uja sosa modo labarik sira nian atu hadia nutrisaun menu merenda eskolar nian. “osan sentavus 15 ne’e ba ne’ebe?,”.
Iha sorin seluk Diretor Eskola Filial Rumbia Kai-koli, Abilio Pereira da Conceicao, dehan sira nia menu ba merenda eskolar laiha problema tanba sira jere osan ho diak.
Tuir nia, maske osan sentavus 15 ne’e hare ba ki’ik maibe kuandu tau hamutuk osan bo’ot. “Ba hau nia eskola, ba nove dias nian ami iha $1200,5 cents e loron-loron tenke despeza $133,35 cents ba merenda eskolar, tanba ami iha alunus 985,” Diretor Eskola Filial Rumbia, Kaikoli ne’e katak.
Diretor ne’e dehan, osan sentavus 15 ne’e kuandu fahe deit ba alunus, klaru ki’ik maibe kuandu osan ne’e parte eskola jere didiak, mak alunus sir abele han diak.
Enkuantu menu ne’ebe loron-loron, parte eskola tein ba alunus sira mak hanesan, etu ,sopa koto mean, makaraun, mina modo tahan, masin , manu tolun no seluk tan.
Tuir observasaun TDW nian iha eskola refere nota katak, labarik sira han etu ho modo koto , modo tahan kahur ho na’an manu (ayam potong).
