Husi: Paulina Quintão, TDW
Membru Parlamentu Nasional sira preokupa maka’as tanba Klinika VIP Parlamentu nian durante ne’e la funsiona no situasaun ida ne’e obriga sira tenke husik abandona plenaria hodi ba halo konsulta iha Ospital Nasional bainhira moras.
Deputada Maria Angelica Rangel hateten, lolos klinika iha Parlamentu Nasional ne’e funsiona ho diak, nune’e Deputadu/a sira bainhira moras bele atende no la presiza ba do’ok to’o iha ospital bo’ot.
“Ami nia kolega Deputada Florentina atu konsulta urgentimente ba iha kotuk laiha, nia tenke halai ba ospital husik hela plenaria,”Deputada Rangel preokupa, iha Parlamentu Nasional.
Tanba ne’e nia husu ba Sekretariadu Parlamentu Nasional atu hare asuntu ida ne’e, buka meius oinsa atu klinika ne’e funsiona hikas, tanba orsamentu aprova tiha ona.
Nia dehan, klinika VIP ne’e rasik la halo atendementu kuaze tinan ida resin ona, tanba ne’e bainhira deputadu/a ruma moras, sira tenke husik hela servisu ba konsulta iha ospital.
Entretantu hatan ba kestaun ne’e, Vise Prezidente Parlamentu Nasional, Deputadu Adriano do Nascimento, katak klinika ne’e la funsiona tanba mediku ne’ebe halo atendementu iha klinika ne’e, ospital nasional dada fali nia.
“Tanba atendimentu saude ba membru parlamentu sira, la’os lor-loron, entaun medikus ne’e tenke ba fo atendimentu ba ema sira iha ospital,” Vise Prezidente PN ne’e dehan.
Maske halo tratamentu iha ospital, nia dehan, iha sala VIP ba membru Parlamentu Nasional atu halo konsulta, no la presiza forma linha.
Iha parte seluk, Ministru Saude, Sergio Lobo dehan, nia parte laiha konesementu kona ba kestaun ne’e, maibe promote nia sei hare, nune’e klinika ne’e bele funsiona fali.
“Hau la hatene, hau foin rona husi imi depois hau hare to’ok kestaun ne’e,” Ministru Lobo dehan.
