Judicial System Monitoring Program liu husi Unidade Relasaun Publiku fahe informasaun kona ba asuntu justisa, ba komunidade iha suku Ponilala,distritu Ermera.
Treinamentu (fahe informasaun) ne’ebe hala’o iha dia 29 Maiu 2013 ne’e, partisipa husi autoridade local iha suku ne’eba, joventude (feto no mane), lian nain inklui reprezentante feto (nain rua), total iha ema nain 30, kompostu husi mane iha 23 no nain hitu feto.
Diretór Ezekutivu Judicial System Monitoring Program (JSMP), Luis Oliveira Sampaio hateten,ne’e hanesan komitmentu ida atu kontinua haklaken no fahe informasaun ba povu, atu sira iha konesementu kona ba justisa.
“Fahe informasaun ba lider komunitária sira, atu nune’é sira iha koñesementu ne’ebé sufsiente kona bá setór judisiáriu, tuir sira nia kbi’it,” Diretór JSMP, Luis Oliveira Sampaio dehan, foin lalais, iha Dili.
Alem de ne’e nia dehan, JSMP mos fahe informasaun kona ba krime, saida mak sei akontese karik ema ida sai akuzadu ba krime, “saida mak hau bele halo karik hau sai vítima husi krime,” Diretor JSMP ne’e katak.
Iha fatin hanesan Xefe Suku Ponilala, Jacinto Amaral, sente kontente tanba ho formasaun ne’ebe JSMP fo ba sira, bele aumenta sira nia konesementu kona ba justisa.
“Ami apresia as tebes ba JSMP ne’ebé bele mai fahe ka habelar informasun sira ne’e, importante tebes mai ami nudar lideransa komunitaria, atu bele hatene rezolve problema tuir sistema justisa formal,” Xefe Suku Ponilala ne’e apresia.
Nia hatutan, programa ida ne’e importante hodi aktualiza no desimina informasaun liu-liu ba lideransa komunitária hodi kontribui ba justisa formal ne’ebé loos, inklui oinsa prosesa tuir justisa tradisional ne’ebe loos.
Entretantu Deputadu Mateus de Jesus hateten, ne’e inisiativa ne’ebe positivu tebes, tanba iha area rurais iha komunidade barak maka seidauk iha konesementu kona ba lei no oinsa maka sira bele asesu ba justisa.
“Espera katak bele halo mos iha suku seluk iha distritu hotu, atu nune’e komunidade hotu – hotu bele iha konesementu kona ba justisa,” Deputadu ne’e esperansa.
