Diretora organizasaun Caucus ‘feto iha politika’, Julieta Ferreira hateten, sira servisu hamutuk ho Sentru Nasional Investigasaun Sientifiku, sei lansa rezultadu peskiza partisipasaun feto iha vida politika, iha tempu badak.
Diretora Ferreira dehan, antes ne’e iha tinan 2012, Caucus ho Sentru Nasional Investigasaun Sientifiku (CNIC) Universidade Nasional Timor Lorosa’e (UNTL) halo ona peskiza kona ba involvement feto iha vida politika.
Tuir nia, peskiza ida ne’e ho intensaun, atu hatene numeru partisipasaun feto iha vida politika (partidus politiku) inklui obstaklu sira.
Iha fulan rua liu ba, nia afirma, sira hamutuk halo ona aprezentasaun rezultadu peskiza ba iha doadores sira ne’ebe durante ne’ suporta sira iha peskiza ne’e, hanesan Indonezia, Cambodia, Filipina no Malaysia, atu hetan apresiasaun antes publika.
“Rezultadu peskiza ne’e ami sei halo sai hanesan livru ida, ho versaun lian Tetun no Indonezia, ho nia pajina kuaze 70 (70 halaman), ida ne’e baziku deit no bele sai hanesan matadalan ba jerasaun foun sira ne’ebe presiza,” Diretora Caucus, Ferreira dehan, iha Mascarenhas,Dili.
Tuir planu, rezultadu peskiza ne’e sei entrega ba governu no Parlamentu Nasional, sai mata dalan ida ba sira, liu-liu bainhira bainaka ruma mai vizita no presiza hatene kona ba involvementu feto iha vida politika, bele uja ida ne’e sai mata dalan ba sira, “maske dadus baziku deit,”.
Iha parte seluk, Deputada Albina Marçal, sente orgulhu ho inisiativa ida ne’e,tanba seidauk iha organizasaun ida tantu governu halo peskiza ida kona ba involvementu feto iha vida politika liu –liu obstaklu no dezafius ne’ebe feto hasouru.
“Hau hanoin ida ne’e importante tebes atu lansa sai livru ida, maibe mos tenke halo peskiza ida profunda to’o iha baze, atu hare klean tanba involvement feto iha vida politika iha deit nivel nasional,” Deputada Marcal sujere.
Nia mos sujere ba organizasaun Caucus, atu halo konsultasaun ho instituisaun relevantes sira kona ba rezultadu peskiza ne’e, hafoin publika no lansa sai livru matan dalan ida ba Timor –Leste.
Deputada ne’e mos fo apresia ba servisu Caucus nian, ne’ebe prepara ona feto potensial sira involve iha vida politika durante ne’e, ne’ebe nia rezultadu positive tebes tanba partisipasaun feto iha Parlamentu Nasional numeru un iha Asia Pasifiku.
