Ministru Saude, Sergio da Costa Lobo hateten, setor saude iha posibilidade bo’ot tebes ba setor privadu sira atu investe, tanba ho partisipasaun setor privadu bele dezenvolve diak liu tan asistensia saude ba komunidade sira ho kualidade.
Ministru Lobo dehan, oportunidade bo’ot ba setor privadu atu investe,liu-liu iha area konstrusaun postu saude iha sukus, servisu limpeza no fornesementu alimentasaun ba pasiente iha ospital referal hotu inklui mos ekipamentus medikus, konsumuveis, medikamentus no transportes.
“No mos investe iha ekipamentus sira hanesan makina raisis no seluk tan, importante mos akompanha ho teknika sira, bainhira ita sei prepara hela ita nia ema,” Ministru Lobo dehan, hafoin partisipa iha enkontru de empresarios para kooperasaun ekonomia no komercial entre Cina ho nasaun ne’ebe koalia lian Portugues (CPLP), (02/07) iha Sentru Convensaun, Dili.
Ministru Lobo informa, sira halo ona aprosimasaun ho ospital iha Malaysia hodi mai investe iha area kardeatria, inklui monta sira nia ekipamentus no sira nia rekursu humanus, nune’e bele halo operasaun ba makina sira ne’e.
Alem de ne’e, Ministru Lobo dehan, ministeriu iha ona planu atu estabelese sentru oncologia, trauma, pulmonologia no hematologia iha Ospital Nasional Guido Valadares (HNGV).
Tanba ne’e tuir nia, enkontru hanesan ne’e importante tebes, troka hanoin entre governu no investor sira husi internasional no nasional sira, nune’e ba futuru sira iha interese bele mai investe iha Timor-Leste.
Entretantu Emprezariu husi Macau, Chang Hexi ne’ebe mos hala’o investimentu iha area saude, hanesan fornese ekipamentus, medikamentus no seluk tan iha ospital sira iha Honkong, Cina no seluk tan, kontente atu servisu hamutuk ho Timor-Leste liu –liu setor saude.
“Hau interese atu servisu hamutuk ho setor saude iha konstrusaun, fornesementu farda, ekipamentus medikus no seluk tan,” Emprezariu Hexi kontente.
Tanba ne’e, iha enkontru ne’e nia mos husu informasaun kona ba sistema no kriteria ba tenderizasaun ne’ebe Ministeriu Saude loke ba setor privado sira iha internasional no nasional sira atu compete, nune’e mos prosesu pagamentu tanba sira iha interese atu koopera ho Ministeriu Saude.
Iha fatin hanesan Emprezaria Nasional, Dulce Alves Fernandes hateten, sira iha interese atu servisu hamutuk ho Ministeriu Saude iha area konstrusaun uma ba medikus no postu saude sira ne’ebe governu planea ona.
Hatan ba kesaun ne’e Ministru Lobo katak depende ba projeitu konstrusaun sira ne’ebe iha,hanesan manutensaun no rehabilitasaun, tuir prosesu kontratu normal liu husi aprovizionamentu.
“Ba investor sira ne’ebe atu investe iha setor saude tenke parseria ho governu, klaru prezensa investor sira importante tebes tanba Timor –Leste saude gratuita, tantu halo transferensia moras ba liur mos governu mak selu,” Ministru Lobo dehan.
