Husi : Ezequiel Freitas,TDW
Membru Parlamentu Nasional husi bloku do governu fo apoia ba deklarasaun Primeiru Ministru, Xanana Gusmao, kona ba atu halo remodelasaun ba membrus do governu ne’ebe laiha kapasidade.
Deputadu Ancelmo da Conceicao, husi bankada Congresu Nasional Rekonstrusaun de Timor (CNRT), hateten, bainhira membru governu ida halo servisu ladun diak, tenke remodela.
“Primeiru Ministru mak hare ba servisu nia membrus sira, tanba nia mak kaer governu, se nia sente labele, hau partikularmente hau apoia,” Deputadu da Conceicao apoia, iha Parlamentu Nasional.
Iha fatin hanesan Deputadu Virgilio da Costa Hornai, husi bankada Partidu Demokratiku (PD), dehan ne’e kompetensia Primeiru Ministru nian, atu halo remodelasaun ba nia membrus.
“Hanesan deputadu la halo interferensia ba desizoens sira ne’ebe ke Primeiru Ministru sei foti, tanba nia rasik tenke garantia ninia servisu iha governasaun, nia mak avalia, se mak merese no se mak la merese,”Deputadu Hornai dehan.
Entretantu Deputadu husi bankada Fretilin, Francisco Branco apoia katak, ne’e kompetensia Primeiru Ministru nudar Xefe du Governu, atu halo remodelasaun ou la’e.
“Ami Fretilin, hanoin katak ida ne’e la’os ema seluk nia responsabilidade maibe responsabilidade primeiru ministru nian,” Deputadu Branco dehan.
Nia dehan, tuir observasaun husi bankada opozisaun durante ne’e, hare katak servisu membru do governu nian buat hotu-hotu paradu, laiha avansu ida.
“Pior liutan kompara governu ida agora ho governu ida liu ba, da ne’e at liutan,” Deputadu Branco kompara.
Primeiru Ministru, Xanana Gusmao rasik deklara esteitmentu ida ne’e hafoin partisipa enkontru entre emprezarius husi Cina no Timor oan iha Sentru Konvensaun Dili, katak sei akontese duni remodelasaun hahu husi nivel altu to’o baixu.
“Hau hakilar bebeik sira,hakilar ministru, diretor sira bebeik, problema husi administrasaun publika mos. Hau remodela hotu kedas,” PM Gusmao dehan.
“Hau mos tuir hela hare, hau konese diretor sira,hahu husi 2007, se-se maka servisu diak, se mak yes man, maibe depois bo’ok an labele, sira atu lohi hau, hau konese tiha ona sira,” PM Gusmao katak.
Gusmao mos husu ba membru Parlamentu Nasional sira atu labele hakilar kona ba remodelasaun ba membrus do governu liu husi media, maibe hato’o ofisial direitamentu ba nia (PM Gusmao).
“La’os hau nia bloku sira hakilar-hakilar iha ne’eba, depois hau hatan tuir kedas,e hau muda buat hotu-hotu,” Xefe Governu ne’e katak.
PM Gusmao mos preokupa tanba membru governu no diretor balun kahur partidu iha administrasaun publiku, ate ida-idak hatama nia ema servisu ne’ebe la tuir Lei Funsaun Publiku.
“Hau dehan tiha ona imi katak,imi nudar administrasaun publika imi servisu ba governu, se-se deit imi hatama fali partidu, imi hatama fali imi nia ema, diak liu imi sai ba Unipessoal tanba labele permiti,” PM Gusmao koalia ho seriu.
PM Gusmao afirma, iha tinan ida ne’e nia parte sei fokus hela hodi hadia uma laran, sei kontinua tu-tuir membru governu no diretor sira nia servisu hodi prepara ba remodelasaun.
Maske nune’e, Gusmao rekonese katak iha membru governu no diretor balun servisu maka’as no diak tebes.
“Ha tenke dehan, katak iha diretor balun servisu ho vontade teb-tebes no servisu maka’as tebes.Balun malandru hanesan ne’e, hau kaer hau konta hotu naran, identidade kompletu,” PM Gusmao hateten.
Nia dehan, foin dadauk iha reuniaun iha Ministeriu Negosiu Estranjeiru no Kooperasaun (MNEK), nia taka portaun hodi hakilar ba ministru sira balun ne’ebe to’o tarde.
“Hau hakilar sira dehan nune’e,imi imajina deit,ami iha ailaran,gerileiru sira ain tanan,hamlaha,kanek moras hau haruka sira ba oin ne’eba sira atu mate,la simu osan ,lao deit kole,hau sei hakilar sira,agora imi hetan tiha kareta,hetan tan mobile,hetan tan salariu no hetan tan buat oi-oin,ne’e hau labele hakilar?.Ne’e imi taka tiha imi nia matan,” PM Gusmao koalia ho seriu.
