Membru Parlamentu Nasional hateten, sira sei halo alterasaun ba artigu balun iha Lei Brankeamentu kapitais, tanba ladun klaru.
Membru Komisaun C (finansas publika), Deputadu Estanislao da Silva dehan, bainhira lei ne’e halo debate iha plenaria Parlamentu Nasional, sira sei altera artigu balun iha lei ne’e.
“Internasional Task Force husu, atu ita tau nia klaru didiak, tanba lei ida ne’e liga ho transaksoens (transaksi) finanseira,finansiamentu terorismu,” Deputadu da Silva dehan, iha Parlamentu Nasional.
Deputadu ne’e dehan, buat sira ne’e iha nia implikasoens bar-barak tebes ba relasoens finanseiras no komersiais entre banku sira ho insttituisaun finanseiras iha mundu tomak.
“Brankeamentu kapitais ne’e nia implikasaun barak ,implikasaun ne’e bele ba iha krime organizadu no finansiamentu terorismu,” Deputadu husi bankada opozisaun ne’e dehan.
Enkuantu lei ne’e rasik agora iha ona Komisaun A Parlamentar no komisaun halo tiha ona seminariu balun no semana oin halo tan audiensia balun antes debate iha PN.
“Hein katak antes dia 08 de JulhuParlamentu debate lei ne’e ho diak liutan, tanba ne’e impaktu bo’ot teb-tebes ba reputasaun ba ita nia rai hanesan estadu soberanu,” Deputadu da Silva tenik.
Iha fatin hanesan Deputadu Pedro da Costa, esplika katak funsaun husi lei brankeamentu kapitais ne’e, mak atu regula osan ne’ebe tama sai iha Timor-Leste.
“Ita halo parte ida ba komunidade internasional, tanba ne’e ita prepara ona lei ida maibe lei ida ne’e seidauk aktualizadu,” Deputadu da Costa katak.
Tuir nia, lei ne’e tama ona prioridade ba komisaun ne’ebe mak responsavel ba ida ne’e, atu diskuti iha tempu badak.
“Se ita la tau prioridade, ema bele diskonfia ita katak,ita mak fase osan ka na’ok osan, hatama osan,tama- sai,” Deputadu ne’e hateten.
Alende ne’e membru Komisaun A, Deputadu Antonino Bianco dehan, komisaun halo tiha ona workshop ida kona ba lei ne’e, no sei halo audiensia ho Banku Sentral no Ministeriu Publiku.
“Lolos halo debate iha fulan Julhu ne’e nia laran,maibe labele tanba parlamentu resesu hela,” Deputadu Komisaun A ne’e dehan.
Nia informa, la’os atu altera artigu balun iha lei ne’e maibe atu halo editamentu ba artigu balun e Komisaun C mak sai proponent ba lei ne’e.
“Parese sira mai husi tekniku sira balun atu altera, maibe tenke hare lai mak altera,” Depuadu Bianco dehan.
